Búginde oblysta buqaralyq sportty damytý baǵytynda az jumystar jasalyp jatqan joq. Jyl saıyn el ıgiligine berilip jatqan sport nysandarynan bólek, ártúrli mekemeler irgesinen kirpishi qalanǵan keshender de barshylyq. Mine sondaı sport zalynyń biri – Taraz qalasyndaǵy Nurǵısa Tilendıev atyndaǵy kópbalaly jáne az qamsyzdandyrylǵan otbasy balalaryna arnalǵan mektep-ınternaty janynan balǵyn balýandarǵa esigin aıqara ashty, dep jazady Qamshy.kz aqparat agenttigi. 

Keshenniń ashylýyna oblys ákimdigi bilim basqarmasy bastyǵynyń orynbasary Talǵat Jamalov, dańqty bapker Ahmet Jumaǵul jáne Rıo Olımpıadasynyń kúmis júldegeri Eldos Smetov qatysyp, jańa sport zaldyń ashylýymen kópshilikti quttyqtady.

- Búgin keremet mereke bolyp tur. Mektep-ınternattyń balǵyn balýandaryna arnalyp, kúres zaly berilýde. Bunyń bári el erteńi sanalǵan jastar úshin memlekettiń kórsetip jatqan qamqorlyǵy. Barlyqtaryńyzdy jańa jattyǵý zalynyń ashylýymen quttyqtaımyn!, -dedi alǵash sóz alǵan oblys ákimdigi bilim basqarmasy basshysynyń orynbasary Talǵat Salqanuly.

Budan keıin sóz tizgindegen dańqty bapker Ahmet Jumaǵul mektep-ınternattyń tárbıelenýshilerine oqýda da, sportta da ozat bolýlaryna tilektestigin bildirip, ómir joldaryna aq batasyn berdi.

Al Rıo Olımpıadasynyń kúmis júldegeri Eldos Smetov bolsa, Sıdneı Olımpıadasynyń chempıony Ermahan Ybraıymovtaı bylǵary qolǵap sheberleri osyndaı mektep-ınternattyń qabyrǵasynan shyqqananyn tilge tıek etip, bul kúres zalyda talaı tolaǵaılardy týdyratynyna bek senimdilik bildirdi.

Budan soń dańqty bapker Ahmet Jumaǵul men memleket maqtanyshy Eldos Smetov kúres zalynyń lentasyn saltanatty túrde qıyp, aralap kórdi.

Jalpy Elbasynyń «Rýhanı jańǵyrý» baǵdarlamasy men Jastar jyly aıasynda ashylyp otyrǵan dzúdo jáne beldesý kúresinen jattyǵý zaly barlyq qajetti quraldarmen jabdyqtalǵan. Munda qazir mektep-ınternattyń 380 tárbıelenýshisiniń 80-i úsh topqa bólinip jattyǵýda. Balǵyn balýandardy oblystyq bilim basqarmasy jattyǵý qurylǵylarymen qamtamasyz etse, QR dzúdo sporty federasıasy tatamı men 50 kımano alyp bergen. Sondaı-aq oblysta elimiz boıynsha tuńǵysh ret qurylǵan «Beldesý»ulttyq sport túri federasıasy da demeýshilik kórsetýde. Al oblys ákimdigi dene shynyqtyrý jáne sport basqarmasy balýandardy baptaıtyn 4 jattyqtyrýshyny sport mektepterinen bólip berip otyr.

Kúres zalynyń mektep-ınternattyń tárbıelenýshilerine keltirer esh zıany joq. Olaı deıtinimiz negizgi jattyǵýlar sabaqtan keıin 16.00-20.30 ýaqyt aralyǵynda ótkiziledi.

Mine, osyndaı tamasha kúres zaly balǵyn balýandarǵa bazarlyq syılaýda. Jáne nysannyń ashylý saltanatyna oraı Halyq Qaharmany R.Qoshqarbaevty eske alýǵa arnalǵan qazaq pen beldesý kúresinen oblystyq týrnır túndigin túrdi. Bul básekege oblys ákimdigi bilim basqarmasynyń «Ǵylymı-tájirıbelik dene shynyqtyrý ortalyǵy» tikeleı uıytqy bolyp otyr.