Qarataý jotasyndaǵy sary fosfordyń mol kenin ıgerý maqsatynda qurylǵan «EvroHım-Karataý» jaýapkershiligi shekteýli seriktestigi óndiriske qajetti mamandardy shetelde daıyndaý, olardy baspanamen qamtý isin óz kúshimen sheshýge daıyn. Sondaı-aq bul iske jergilikti ákimdik te belgili bir deńgeıde úles qosýǵa daıyn. Bul jaıynda Jambyl oblysy ákimi Asqar Myrzahmetov pen atalǵan seriktestiktiń bas dırektory Dmıtrıı Valyshevpen kezdesýinde aıtyldy, dep jazady Qamshy.kz aqparat agenttigi. 

Bul kezdesýde taraptar óndiriske qajetti kadrlardy daıyndaý jáne olardyń áleýmettik-turmystyq máselelerin birlese sheshý múmkindikterine basa nazar aýdardy.

Seriktestiktiń bas dırektory Dmıtrıı Valyshev óndiriske qajetti kásibı mamandardy daıarlaý úshin Reseıdegi joǵarǵy jáne arnaýly orta oqý oryndarymen tyǵyz qarym-qatynasta ornatylǵanyn jetkizdi.

– Bul maqsatqa qol jetkizý úshin reseılik joǵary jáne arnaýly oqý oryndarynyń arnaıy jyljymaly qabyldaý komısıasy uıymdastyryldy. Kúni búginge deıin Jańatas qalasynan 12 adam oqýǵa jiberilgen. Bizdiń seriktestikte aldaǵy ýaqytta óz esebinen óndiriske qajetti mamandardy oqytyp, biliktiligin arttyrýdy jalǵastyra beredi, –dedi seriktestiktiń bas dırektory Dmıtrıı Valyshev,

Óz kezeginde Asqar Isabekuly óndiris oshaǵyna qajetti kadrlardy jergilikti turǵyndar arasynan alyp qaıta daıarlaýdyń mańyzdylyǵyna nazar aýdaryp, oǵan ákimdik tarapynan qoldaý bildiretinin aıtyp etti. Óńir basshysy aımaqta kásiptik bilim berýde grant bólý erejeleri tıisti zań talaptaryna saı bekitilgenin tilge tıek etip, kásiporyn múmkindigi sheńberinde jastardy Reseı jáne basqa da elderde biliktiligin jetildirýge yqpal etýge shaqyrdy.

«EvroHım-Karataý» jaýapkershiligi shekteýli seriktestiginiń bas dırektory óńir basshysynyń bul oıyn quptap, sol baǵytta sharalardyń jalǵasa beretindigine nazar aýdardy. Sondaı-aq óndiris orny mamandardy turǵyn úımen qamtý máselesin sheshýdiń jolyna toqtalyp, bul baǵytta Jańatastaǵy eski turǵyn úılerdi qaıta jańǵyrtýdan ótkizýdiń tıimdiligin sóz etti. Sáıkesinshe bul josparǵa jergilikti bılik qoldaý bildirýge daıar

Kezdesý sońynda EvroHım-Karataý» jaýapkershiligi shekteýli seriktestiginiń bas dırektory kásiporyn tarapynan jumysshylardy turǵyn úımen qamtý isin jolǵa júıeli qoıý jaıyna toqtaldy.