Úkimet otyrysynda QR Eńbek jáne halyqty áleýmettik qorǵaý mınıstri Birjan Nurymbetov ataýly áleýmettik kómekke qatysty birqatar jańashyldyqtardy tanystyrdy. Sharalar kómektiń shynaıy muqtaj adamdarǵa ǵana taǵaıyndalýyn, áleýmettik jaǵdaıyn qasaqana tómendetý oqıǵalarynyń jolyn qıýdy qamtamasyz etýge baǵyttalǵan, dep habarlaıdy Qamshy.kz aqparat agenttigi.

Mınıstr, ataýly áleýmettik kómek ómirlik qıyn jaǵdaıǵa tap bolǵan jáne odan óz betinshe shyǵýǵa múmkindigi joq adamdarǵa ǵana taǵaıyndalýy tıistigin aıtty. Osyǵan baılanysty AÁK toqsan saıyn taǵaıyndalmaq. Al shartty jáne shartsyz kómek úsh aıǵa beriledi.

Barlyq otbasy múshelerine AÁK orta tabysy men kedeıshilik shegi arasyndaǵy aıyrmashylyq kóleminde tólenetin bolady.

Eger otbasynyń eńbekke qabiletti múshesi usynylǵan jumyspen qamtý sharalarynan bas tartsa, onda ol jáne onyń otbasynyń barlyq músheleri AÁK alý quqyǵynan aıyrylady.

Sonymen qatar bala kútimimen aınalysatyn anaǵa bala úsh jasqa tolǵannan keıin jumyspen qamtýdyń belsendi sharalaryna qatysý quqyǵyn berý usynylady.

Sondaı-aq ýchaskelik komısıalar jumysy kúsheıtiledi.

"Ókinishke qaraı, ataýly áleýmettik kómek alýshylar birneshe qabatty jeke úılerde turyp jatqan, birneshe avtokóligi bolǵan, jer ýchaskeleri men qosalqy sharýashylyqtarynyń úlken kólemde bolǵan mysaldar az emes. Bul jaǵdaılar ýchaskelik komısıanyń jaýapkershiliginde. Sondyqtan zań jobasynda ýchaskelik komısıalar úshin ataýly áleýmettik kómekke muqtajdyǵyn anyqtaý ólshem sharttaryn bekitý úshin ortalyq atqarýshy organnyń quzyretin qaraý usynylady", – dedi ol.

Osy oraıda mınıstr ataýly áleýmettik kómekke úmitker otbasylardyń sanynyń artýy qoǵamdyq negizde jumys isteıtin ýchaskelik komısıalardyń jumysyna áser etkenin moıyndady.

«Sondyqtan biz zańda ýchaskelik komısıalarǵa otbasynyń materıaldyq jaǵdaıyna qorytyndy jasaý úshin merzimdi úsh kúnnen jeti kúnge deıin arttyrýdy usynamyz», - dedi B.Nurymbetov.

Eske salaıyq, QR Eńbek jáne halyqty áleýmettik qorǵaý mınıstri búgin Úkimet otyrysynda ataýly áleýmettik kómekti berýdiń qoldanystaǵy júıesin ózgertetin zań jobasyn ázirledi. Basty baǵyt – eńbekke yntalandyrý, azamattardyń tabystaryn jáne memlekettik qoldaý mólsherin esepke alýǵa qatysty ashyqtyq pen ádilettikti qamtamasyz etý.

QazAqparat