Parlament májilisiniń depýtaty Zaǵıpa Bálıeva 2 prosenttik ıpotekanyń alǵashqy jarnasyn alyp tastaýdy usyndy, dep habarlaıdy Qamshy.kz aqparat agenttigi Sputnik Qazaqstan saıtynyń deregin negizge alyp. 

Depýtat atap ótkendeı, búginde Turǵyn úı qurylys jınaq banki "Baqytty otbasy" baǵdarlamasyn qolǵa aldy. Sonyń aıasynda kópbalaly, tolyq emes jáne múgedek balasy bar otbasylarǵa 2 prosenttik baspana kredıti beriledi. Biraq ol úshin 10 prosent kóleminde alǵashqy jarnany salý qajet.

"Osy ýaqytqa deıin nebary 3 000 ótinish túsken eken. Nege? Sebebi 10 prosenttik alǵashqy jarnany bári birdeı taýyp bere almaıdy. Bank alǵashqy jarna adamnyń tólem qabilettigi úshin kerek deıdi. Erli-zaıyptylar jalaqy týraly anyqtamany kórsetse, jetpeı me? Máselen, astanada kópbalaly otbasy jaldamaly páter úshin 40-100 myń teńge tóleıdi. Odan da alǵashqy jarnasyz kredıt alyp, ol aqshany soǵan jumsaǵan tıimdi emes pe?", - dedi Bálıeva búgingi úkimet saǵatynda.

Depýtattyń sózine qaraǵanda, búginde alǵashqy jarnany kópbalaly otbasy bylaı tursyn, jas otbasynyń ózi jınaı almaıdy. Sondyqtan halyqqa senimmen qarap, 2 prosenttik ıpotekany alǵashqy jarnasyz bergen durys. Sonda osy baǵdarlamaǵa suranys ta artady.

"Men ózim eseptep kórdim. Mysaly, jergilikti jerde 10 mıllıon teńgeni 20 jylǵa alǵashqy jarnasyz beretin bolsaq, onda aı saıyn 58 332 teńgeni aýdarý kerek. Ondaı aqshany kez kelgen otbasy tóleı alady. Kópbalaly otbasy bolsyn, múgedek balasy bar otbasy bolsyn, barlyǵy ońaı tóleı alady. Al Nur-Sultan qalasynda kredıtke 15 mıllıon teńge berilse, aı saıyn 87 500 tóleý kerek. Ol da qıyn emes", - dep atap kórsetti Bálıeva.

Osy oraıda depýtat "Baqytty otbasy" baǵdarlamasyna qatysa alatyndardyń qataryna jas otbasylardy da qosýdy usyndy.