Qazaqstannyń ishki ister mınıstri Erlan Turǵymbaev Aqmola oblystyq polısıa departamenti basshysy Berik Bilálovti qyzmetinen bosatty dep habarlaıdy Qamshy.kz aqparat agenttigi vedomstvo baspasóz qyzmetine silteme jasap.

"Basshynyń orynbasary A. Sádýov pen qarjylyq qamtamasyz etý basqarmasynyń basshysy S. Jumalınaǵa qatysty sybaılas jemqorlyq qylmysyn jasady degen kúdikpen sotqa deıingi tergeý júrgizilýine baılanysty polısıa departamentiniń basshysy general-maıor B. Bilálovqa atqaryp otyrǵan qyzmetinen bosatý týraly baıanat berildi", - delingen habarlamada.

Aqmola oblystyq polısıa departamenti basshysynyń mindetin atqarýshy bolyp Qazaqstan İİM Krımınaldyq polısıa departamentiniń basshysy polısıa general-maıory Armanbek Baımýrzın taǵaıyndaldy.

4 qazanda Aqmola oblystyq polısıa departamentiniń polkovnıkteri Sadýov pen Jumalınanyń ustalǵany týraly belgili boldy. Olarǵa qatysty "senip tapsyrylǵan múlikti ıemdený nemese ysyrap etý" baby boıynsha aıyp taǵyldy.  Kúdiktiler quqyq buzýshylyqty bir jyl boıy jasaǵany anyqtaldy.

Sádýov 2018 jyldyń sáýir aıynda oblystyq PD basshysynyń orynbasary laýazymyna taǵaıyndalǵan. Buǵan deıin asa mańyzdy qylmystardy tergeýmen aınalysty, uıymdasqan qylmysqa qarsy kúres basqarmasynyń basshysy boldy. Jumalına ishki ister organdarynda 20 jyl qyzmet etken, onyń jeti jylyn Aqmola oblystyq PD qarjylyq qamtamasyz etý basqarmasyna basshylyq etti.