Almaty ákimdiginiń baspasóz ortalyǵynda ótken brıfıńte «Baqyt» dekoratıvti-qoldanbaly óner ortalyǵynyń menedjeri, kórmeni uıymdastyrýshy Kúnsulý Ábdikárim atalǵan sharanyń 4-6 qazan aralyǵynda ótetinin habarlady, dep jazady qalalyq ákimdiktiń baspasóz qyzmeti.

Kórme-jármeńke taqyryptyq ataýlar boıynsha bir jylda tórt ret ótedi: kóktemde – «Qyzǵaldaqtar ýaqyty», jazda – «Jibek joly», kúzde – «Altyn alma» jáne qysta -– «Shyǵys bazary».

«Mundaı sharalar Orta Azıa elderi arasynda ekonomıkalyq jáne mádenı baılanystardy damytýda úlken mańyzǵa ıe. Almaty bir jyl ishinde birneshe ret túrli memleketterdiń qoldanbaly óner sheberleriniń ortalyǵyna aınalady», – dep atap ótti Ortalyq memlekettik mýzeıdiń baspasóz hatshysy Aqmaral Aıdynbaeva.

Jármeńkege Qazaqstannyń, Qyrǵyzstannyń, Tájikstan men Túrkmenstannyń, Ózbekstan men Reseıdiń jáne Grýzıanyń sheberleri jasaǵan syılyq jáne sývenır buıymdar qoıylady, olar: kıim, panno, gobelender, kıiz ben teriden jasalǵan buıymdar, toqylǵan zattar, zergerlik buıymdar, bıjýterıa jáne basqalary.

Usynylatyn sývenırlik buıymdardyń negizgi taqyryby – almalar. Óıtkeni, alma – Almatynyń basty sımvoly.

Dekoratıvti-qoldanbaly óner boıynsha sheberlik synyptary qatar ótetin bolady.