«Bastaý bıznes» memlekettik baǵdarlamasy talaıdyń jolyn ashqany belgili. Ásirese óz kásibin ashýǵa júreksingen jurt úshin bul baǵdarshamǵa aınaldy. Nátıjesinde Jambyl oblysy Qordaı aýdanynda úsh jyldyń ishinde joba úmitkerleri 910,07 mıllıon teńge nısıe alǵan. Bul kásipkerliktiń kókjıegi keńeıip ǵana qoımaı, jańa jumys oryndary ashyldy degen sóz, dep jazady Qamshy.kz aqparat agenttigi. 

«Kepilzattyq qamtamasyz etý jáne nesıe tarıhtary boıynsha mınımaldy bazalyq talaptary men nıeti bar azamattardyń basym bóligi nesıelerin alyp úlgerdi. Problemalar tek qana ótimdi kepilzattyq qamtamasyz etýdi usyna almaǵandarda týyndady. Nesıe tarıhy nashar azamattardy biz aldyn ala eskerip, qujattardy qabyldaý barysynda shyǵaryp tastaımyz», – deıdi «Atameken» kásipkerler palatasy Qordaı aýdandyq fılıalynyń dırektory Erjan Áden.

Taǵy bir qýanarlyq fakt - Inovasıalyq jobalardy damytýǵa bólingen granttar jáne jas qatysýshylarǵa bólinetin granttar somasy mıllıard teńgege jaqyndaǵan. Al, jobalardyń basym bóligi aýyl sharýashylyǵynda iske asyrylyp jatqanyn eskersek, bul salaǵa salynǵan qosymsha ınvestısıa ekenin ańǵarýǵa bolady. Ekinshi mańyzdy tusy – jumyspen qamtýdy qamtamasyz etý. Nesıe alǵan baǵdarlama qatysýshylary jeke kásipker retinde tirkelip, salyq, zeınetaqy jáne áleýmettik tólemderdi aýdarýǵa, jumysqa qyzmetker qabyldaýǵa mindetti. Aýdanda keıingi úsh jylda «Bastaý Bıznes» baǵdarlamasynyń qatysýshylary 253 jańa kásipker, demek jumyssyz jáne ózin-ózi qamtyǵan adamdar sany azaıǵan. Al, bul kásipkerler jumysqa adam qabyldaıtynyn eskersek, bul san eki ese ósedi.

Jastardyń kóbi úshin bul joba ómirde óz ornyn tabýǵa múmkindik berýde. Mysaly, Jańaturmys aýylynyń turǵyny Aıbolat Amanbaev jýyrda joba boıynsha oqýdy aıaqtap, granttyq qarjylandyrýǵa qujat daıyndaý ústinde.

«Bul joba týraly óz tanystarymnan estidim. Osyǵan deıin Qordaıda, Almatyda kez-kelgen shashtarazda erler shashtarazshysy bolyp jumys istep, óz isimdi bastaýdy armandap júrgen edim. Oǵan qarajatym bolǵan joq. Kásipkerler palatasyna tapsyrys berip, oqýdy aıaqtap, grantqa qujat jınap jatyrmyn», – deıdi ol.

Al, Qordaı aýylynyń turǵyny Kámshat Orazymetova grantqa qumbloktaryn óndiretin apparat alýdy josparlaýda.

«Bastaý Bıznes» jobasy jaıynda men teledıdardan bildim. Baǵymdy synap kóreıin dedim, oqýdy aıaqtadym, endi qarjylandyrýdy kútip otyrmyn. Joldasym ekeýimiz úıde qumbloktaryn jasaımyz, apparatty qoldan jasadyq, sondyqtan sapasy nashar. Zaýyttan shyǵarylǵan jaqsy apparat alýdy kózdep otyrmyz», – dep josparlarymen bólisti ol.

Jalpy, aýdanda bastamashyl jáne belsendi azamattar kóp, olarǵa tek qana isin bastaýǵa kómek kerek. «Bastaý Bıznes» jobasy ol úshin taptyrmas múmkindik.