Elbasy N.Nazarbaevtyń Qazaqstan halqyna jyl saıynǵy Joldaýlarynda áleýmettik sala nazardan tys qalǵan emes. Memleket basshysy Qasym-Jomart Toqaev ta Qazaqstan Respýblıkasynyń Prezıdenti qyzmetine kirisken boıda osy baǵyttaǵy jumystarǵa basa kóńil bólip keledi. Rasynda da turǵyndardyń turmysyn tikteýde bul baǵyttaǵy sharýalardy shıratýdyń mańyzy zor.

Bıyl Taraz qalasynda áleýmettik salaǵa 35 mıllıard 775,7 mıllıon teńge bólingen. Iaǵnı, qala búdjetiniń 49,9 paıyzy baǵyttalyp. Onyń ishinde jumyspen qamtý jáne áleýmettik qamtamasyz etý shyǵyndaryna 4 mıllıard 319,6 mıllıon teńge qarastyrylǵan.

-2019 jyldyń qańtar - tamyz aılarynda 2 mıllıard 446,2 mıllıon teńgege 10242 otbasyna áleýmettik kómek kórsetildi. Onyń ishinde 2804 otbasyna 113,2 mıllıon teńgege turǵyn úı kómegi, 7438 otbasynyń 37184 adamyna 2 mıllıard 333,0 mıllıon teńgege ataýly áleýmettik kómegi taǵaıyndalyp, tólendi. Jyl basynan beri belsendi jumyspen qamtý sharalarymen 3875 azamat qamtyldy. Onyń ishinde memlekettiń qoldaýynsyz bos oryndarǵa 1727 adam, áleýmettik jumys oryndaryna 31 adam, jastar tájirıbesi boıynsha 323 adam jáne qoǵamdyq jumys oryndaryna 709 adam, qysqa merzimdi kásiptik kýrstarǵa 905 adam, shaǵyn nesıe berý boıynsha 9 adam jáne ınfraqurylymdyq jobalar boıynsha 171 adam ornalasqan. Osy jumyspen qamtylǵandardyń ishinde 1727 adam turaqty jumys oryndaryna ornalasty,-deıdi Taraz qalasynyń ákimi Qaırat Dosaev.

Esepti kezeńde ýákiletti jumyspen qamtý organyna resmı túrde jumysqa ornalasýǵa 4615 adam ótinish bildirse, onyń 2961-i jumyspen qamtylypty. Budan bólek 2019 jylǵa qoǵamdyq jumystaryna 186,3 mıllıon teńge bólinip, 630 adam joldanýy josparlanǵan. Osy jyly qoǵamdyq jumysshylardyń jalaqysy 56350-63750 teńgeni quraıdy. Aǵymdaǵy jyldyń basynan aqyly qoǵamdyq jumysqa jumyssyzdar qatarynan 709 azamat qatystyryldy.

Búgingi kúnge zeınetkerler sany 45 898 adamdy qurasa, múgedekterdiń sany 16 330 adam. Onyń ishinde I- top – 1473, II - top – 6675, III top – 5523 jáne 18 jasqa deıingi múgedek balalar sany – 2659 adamdy quraıdy.

Taǵy bir aıta keterligi, bıyl múmkindigi shekteýli 75 azamatty jumyspen qamtý josparlansa, qańtar-tamyz aılarynda 176 azamat jumyspen qamtyldy. Onyń ishinde: aqyly qoǵamdyq jumystarmen – 37 adam, jastar tájirıbesimen – 12 adam, 76 adam turaqty jumyspen jáne qysqa merzimdi oqýmen – 51 adam qamtyldy.

Qazirgi ýaqytta qala boıynsha jumyssyzdyq deńgeıi 5,8 paıyzdy, eń tómengi kún kóris deńgeıi 27 840 teńgeni, ortasha nomınaldy aılyq jalaqy 131 458 teńgeni qurady.