Búgin, 12 qazanda shahar basshysy B.Saǵyntaev qaladaǵy mektepterde ótken kógaldandyrý aksıasyna qatysty, dep habarlaıdy qalalyq ákimdiktiń baspasóz qyzmeti.

Jasyl Almaty jalpyqalalyq aksıasy aıasynda bilim oshaqtarynda 4360 kóshet otyrǵyzyldy. Bul kúni Baqytjan Saǵyntaev Naýryzbaı men Alataý aýdandaryna qarysty №200 jáne №181 mektepteriniń oqýshylary jáne muǵalimderimen birge boldy. Atalǵan eki mektepte 600-ge jýyq kóshet otyrǵyzyldy. Jalpy qaladaǵy 110 mekteptiń joǵary synyp oqýshylary, ata-analary men ustazdary birigip, 4360 túp akasıa, qaraǵaı, katalpa, úıeńki, shaǵala kóshetterin otyrǵyzdy.

«Joǵary synyp oqýshylarymen birge ata-analardyń da shyqqany qýantady. Demek, olar qorshaǵan ortanyń jaı-kúıine nemquraıly qaramaıdy degen sóz. Sondyqtan da bolar olar bizdiń úndeýimizge ún qatyp, kógaldandyrý jumystaryna qulshynyspen kiristi. Olar óz aǵashtaryn kútip, sýǵaratyn bolady», – dep atap ótti B.Saǵyntaev.

«Bolashaǵymyzdy týǵan qalamyzben baılanystyramyz. Biz Almatynyń búgin jáne bolashaqta da álemdegi ekologıalyq taza ári eń jasyl qala bolǵanyn qalaımyz!», – dedi aksıaǵa qatysqan balalar.

Erteń, 13 qazanda Kók Tóbe taýynyń baýraıynda órtten zardap shekken aǵashtardyń ornyna kúzgi aǵashtardy otyrǵyzý naýqany ótedi. Buǵan deıin Mohnatka taýynyń baýraıynda 50 myń Shrenk shyrshasynyń kóshetteri otyrǵyzylǵan bolatyn. Kógaldandyrý aksıasyna qoǵam ókilderi, eriktiler men jastar qatysty.