Memleket basshysy Qasym-Jomart Toqaev memlekettik qyzmetshilerdiń jalpy halyq aldyndaǵy jaýapkershilikti sezinip, árkez adal ári ashyq qyzmet kórsetýin basty talap etkeni málim. Osyǵan oraı Jambyl oblysyndaǵy aýdandarda «Servıstik ákimdik» ortalyǵy ashylyp, «Open space» jobasy qolǵa alynýda, dep jazady Qamshy.kz aqparat agenttigi. 

Máselen Shý qalasy ákimdigi ǵımaratynyń birinshi qabatynda jumys jasaıtyn «Servısti ákimdik» ortalyqta Shý aýdany ákimdiginiń sáýlet jáne qala qurylysy, turǵyn úı ınspeksıasy, turǵyn úı-kommýnaldyq sharýashylyǵy bólimderi men komýnalyq qyzmetter kórsetetin mekemelerdiń mamandary qyzmet kórsetedi. Mundaı ortalyqtar Merki aýdany ákimdigi ǵımaratynyń 1 qabatynda da ashyldy. Jalpy aýmaǵy 56 sharshy metrdi quraıtyn ortalyqta aýdan ákimdiginiń sáýlet, qala qurylysy jáne qurylys, jer qatynastary, turǵyn úı-kommýnaldyq sharýashylyq, jol kóligi, avtomobıl joldary, aýyl sharýashylyq bólimi jáne oblystyq ınvestorlarǵa qyzmet kórsetý, jobalyq basqarý, sıfrlandyrý ortalyǵynyń Merki aýdandyq bólimshesi ornalasqan. Sondaı-aq oblys ortalyǵyndaǵy sýmen qamtý júıelerine jaýapty «Taraz Sý» kásipornynda servıstik qyzmet kórsetý ortalyǵy ashylǵan. Osy ortalyq kómegimen qalanyń kez-kelgen turǵyny jeke sharttar jasaý, tehnıkalyq sıpattaǵy máseleler, tutynylǵan sý men káriz úshin tólem shottaryn salystyrý, páterlerge jáne úılerde ornatylǵan sý eseptegish quraldaryn tirkeýge ótinish bere alady. Sonyń nátıjesinde bir mezette júzge jýyq abonentti ártúrli máselesi boıynsha qabyldaý múmkindigi týdy. Taraz qalasynda da sáýlet jáne qala qurylysy men jer qatynastary máseleleri boıynsha qyzmet kórsetetin «Servıstik ákimdik» ashyldy.

Sonymen qatar Baızaq aýdany men Taraz qalasy ákimdiginde «Open space» formatyndaǵy keńseler qyzmet kórsete bastady. Bul joba Talas aýdany ákimdigi de qoldaý bildirdi. Onda aýyl sharýashylyǵy, jer qatynastary men qalalyq sáýlet jáne qala qurylysy bóliminiń mamandary halyqqa qyzmet kórsetedi. Qazaqstan Respýblıkasynyń Memlekettik qyzmet isteri agenttiginiń Jambyl oblysy boıynsha departamenti de «Open space» formatynda jumys jasaýǵa kóshti. Departament basshylyq quramy azamattardy tolyqtaı ashyq áınektermen jabdyqtalǵan kabınetterde qabyldap jatyr.