Qazaqstannyń kıeli jerleri kartasynyń tizimine Jambyl oblysynan óńirlik deńgeıde engizilgen 27 nysannyń biri «Qazaq handyǵy» monýmenti sanalady. Osydan 5 ǵasyrdan astam ýaqyt buryn qazirgi qazaq memlekettiliginiń alǵysharty sanalatyn Qazaq handyǵynyń irgetasyn qalǵan Kereı men Jánibekti beıneleıtin eskertkish Taraz qalasynda ótken dúbirli toı kezinde Elbasy Nursultan Nazarbaevtyń qatysýymen saltanatty túrde ashylǵan, dep jazady Qamshy.kz aqparat agenttigi. 

Óz kezeginde Tarazdyń batys qaqpasy mańyna ornalasqan bul nysan qazaq tarıhynyń tarıhı asa mańyzdy kezeńderin aıǵaqtaıdy. Músindik kompozısıadan turatyn monýmentte aq mármárdan jasalǵan 27 metrlik stela jáne Kereı men Jánibek handardyń 5 metrlik músinderi bar. Qazaq handyǵynyń alǵashqy hany retinde halyq aq kıizge orap kókke kótergen Kereı hannyń músininiń qolynda qaǵaz ben qalam beınelegen. Shamasy bul músin Kereı hannyń Qazaq handyǵy qurylǵandyǵyn jarlyq etken sátin beınelegen bolýy kerek. Al keıinnen Kereıdiń iz basqan Jánibek hannyń qolyndaǵy naıza men tizesine qoıylǵan qylysh onyń qajyr-qaıraty men jastyqqa tán erik jigerin tanytyp tur.

Sondaı-aq monýment mańyndaǵy 3,5 gektar aýmaq kógaldandyryp, munda kelýshilerdiń avtokólikterine arnalǵan avtoturaq salyndy. Monýmenttiń qurylys jumystary men ony aýmaǵyn kógaldandyrýǵa «Jambylhımqurylys ınjınırıń», «QazArtSıstem» jaýapkershiligi shekteýli seriktestikteri aınalysqan.

Monýmenttiń ashylý saltanatynda sóılegen sózinde Elbasy-Tuńǵysh Prezıdent qazaq memlekettiliginiń negizin qalaǵan Kereı men Jánibektiń tarıhı róline aırqsha toqtalyp ótti.

–Tól tarıhymyzdy áldeqaıda tereń ekenin jastarǵa kórsetpesek, «Máńgilik el» ıdeıasy oryndalmaıtyn bolady. Sondyqtan kóne tarıhymyzdy jer-jerden izdestirýimiz kerek. Jazyp, jınap, nasıhattaýymyz qajet. Biz keshe ǵana bola qalǵan halyq emespiz. Kereı men Jánibek tý kótergende, tarıhta «Qazaq handyǵy» quryldy. Ásirese ósip kele jatqan ul-qyzdarymyz bizdiń tarıhymyz tereń ekenin bilýimiz kerek, –dedi Nursultan Ábishuly.

Aıta ketý kerek Kereı jáne Jánibek handar irgetasyn qalaǵan Qazaq handyǵynyń 550 jyldyq mereıtoıy dál os handyq qurylǵan Jambyl oblysynda 2015 jyldyń qazan aıynda halyqaralyq deńgeıde atalyp ótken edi.