Elbasy N.Nazarbaev Qazaqstan halqyna arnaǵan Joldaýynda: "Dene shynyqtyrý men sport memlekettiń aıryqsha nazarynda bolýy tıis. Naq sol salaýatty ómir salty ult densaýlyǵynyń kilti bolyp sanalady" - dep, halyqtyń dene shynyqtyrý jáne sportpen jappaı aınalysýy úshin sporttyq ınfraqurylymdardyń qoljetimdiligin keńeıtý qajettigine kóńil aýdarǵany belgili.

Osyǵan oraı Jambyl oblysynyń túkpir-túkpirinde jańa sport nysandary ashylyp, jergilikti azamattardyń buqaralyq sportpen shuǵyldanýyna barynsha jaǵdaı jasalýda. Osyndaı nysannyń biri Baızaq aýdanyndaǵy Býryl aýylynda ashyldy. Jeke kásipker Qýanysh Shermetovtiń demeýshiligimen boı kótergen jańa tıpti shaǵyn fýtbol alańynyń ashylý saltanatyna aýdan ákimdigi ishki saıasat bóliminiń basshysy Saltanat Imanova, Býryl aýyldyq okrýginiń ákimi Erik Áliqulov qatysty.

Saltanatty sátte sóz alǵan aýdan ákiminiń orynbasary Dáýir Dáýletov elden shyqqan azamat Qýanysh Asanulynyń el ıgiligi úshin atqarǵan márttik isine alǵys aıtty. Sonymen birge, aýdan aýmaǵynda atqarylyp jatqan birqatar ıgi isterge toqtalyp ótti. "Myqty sportshylardyń kóbi aýyldan shyǵady. Osy "Alınur - Arena" shaǵyn fýtbol alańynan elge, álemge belgili azamattar tárbıelenip shyqsyn" - dedi Dáýir Rysbaıuly.

Shaǵyn fýtbol alańshasynda jankúıerler otyratyn oryndyq, jańa qaqpa, jasandy tósenish salynǵan. Óz qarajatynan 15 mıllıon teńge jumsap, zaman talabyna saı shaǵyn sport alańyn salǵan kásipkerge aýyl turǵyndarynyń alǵysy sheksiz. Zeınetker Orynbaı Ájibekov turǵyndar atynan ystyq yqylasyn jetkizip, aq batasyn berdi. Elge tartý etilgen sport alańyn jaqsy kúıde ustaý aýyldyqtardyń mindeti ekenin aıtty.

Saltanatty shara sońynda jańa fýtbol alańynyń lentasyn jeke kásipkerdiń ákesi Asan aqsaqal men eńbek ardageri Orynbaı Ájibekov qıyp, shashý shashyldy. Aýyl ónerpazdary Erlan Mashırov "Aýylǵa", Shárden Asylaı "Assalaýmaǵaleıkým" ánderin áýelete shyrqady.

Saltanatty jıyn sońy aýyldyq okrýgterden jasaqtalǵan segiz komanda arasynda ótken fýtboldan áýesqoılar jarysyna ulasty. Týrnır nátıjesinde "QazTransGaz" komandasy birinshi oryndy ıelense, júldeli ekinshi, úshinshi oryndar tıisinshe "Kóktal" jáne "Qumjota" komandalaryna buıyrdy. Jarys júldegerleri uıymdastyrýshylar tarapynan komandalyq jáne jekeleı Dıplomdar, medaldar, aqshalaı syılyqtarmen marapattaldy.