Jambyl oblysynda jasóspirimder qylmysymen kúresti kúsheıtý jáne ókiletti organdar arasynda osy jumysty uıymdastyrý tásilderin sapaly ózgertý aıasynda qadaǵalaýshy organdar qamqorlyǵymen jasóspirimder qylmysynyń profılaktıkasy boıynsha mobıldik toptar qurylǵan bolatyn. Atap aıtqanda, prokýratýra organdarynda aldyn alý jáne ıdeologıalyq jumystardy ótkizý úshin eń problemalyq orta bilim beretin mektepterge bekitilgen vedomstvoaralyq bes mobıldik toptar qurylyp, osy jumysqa qoǵamdyq uıymdar ókilderi de tartylǵan bolatyn.

Jýyrda Baızaq aýdany ákimdiginiń májilis zalynda aýdan prokýrory Rýstam Ábilhaırovtyń tóraǵalyǵymen mobıldik top músheleri, mektep dırektorlarynyń tárbıe isi jáne quqyqtyq tárbıe isi jónindegi orynbasarlary men pedagog - psıhologtar, aýdandyq polısıa bóliminiń basshysy jáne qyzmetkerleriniń qatysýymen jıyn bolyp ótti.

Jıynda áýeli bes mobıldik toptyń ústimizdegi jyly atqarǵan jumystary týraly aýdandyq prokýratýranyń prokýrory Juldyz Qoıkenova, kámeletke tolmaǵandar arasynda 2019 jyly oryn alǵan quqyq buzýshylyqtar jáne atqarylǵan jumystar jóninde aýdandyq polısıa bólimi JPQB IýPT ınspektory Asqat Rápilbektiń esebi tyńdaldy. Sonymen qatar, aýdan ákimdigi bilim bóliminiń ádiskeri Indıra Spanalıeva ata-anasynyń yqpalymen dástúrli emes dinı aǵymǵa tartylǵan kámeletke tolmaǵandar jáne biryńǵaı mektep formasynyń talaptaryn oryndamaıtyn oqýshylardyń ata-analarymen júrgizilgen jumystar týraly, ádisker Razıa Sábıtbekova kámeletke tolmaǵandar arasynda zorlyq - zombylyqtyń jáne ózine - ózi qol jumsaýdyń aldyn alý baǵytynda aǵymdaǵy jyly atqarylǵan jumystar týraly baıandama jasady. Budan bólek, atalǵan keńeste aýdan ákimdigi janyndaǵy kámeletke tolmaǵandar isi jónindegi komısıa, bilim berý, polısıa bóliminiń jumysyndaǵy zań buzýshylyqtar men kemshilikter de nazardan tys qalmady.

Jıyn barysynda birqatar usynystar ortaǵa salynyp, nátıjesinde ýákiletti memlekettik jáne jergilikti atqarýshy organdarǵa jasy kámeletke tolmaǵandarmen jasalǵan qylmys pen quqyqbuzýshylyqtyń, olardyń arasyndaǵy ózine qol jumsaýdyń aldyn – alýǵa tıisti sharalar qoldaný hattamaǵa engizilip, tıisti tapsyrmalar berildi.

Jıyn sońynda mobıldik toptardyń quramyna ózgerister engizildi.