Baızaq aýdanynda qant qyzylshasyn jınaý naýqany bastaldy. Baızaqtyq dıqandardyń egis alqabynan jınalǵan strategıalyq daqyldy Taraz qant zaýyty qabyldap jatyr. Aǵymdaǵy jyly Baızaq aýdanynda 1207 gektar alqapqa tátti túbir egilgen.Sáıkesinshe baızaq dıqandar bıyl qant zaýyttaryna 35-36 myń tonna túbir ótkizýdi josparlap otyr, dep jazady Qamshy.kz aqparat agenttigi. 

Jalpy aǵymdaǵy jyly baızaqtyq dıqandar qyzylsha alqabyn kóbeıtý arqyly onyń ónimdiligin arttyrýǵa aıryqsha kóńil bólýde.

–Aýdanda dıqandardyń ala jazdaı ekken eńbegi esh ketpeýi úshin qant qyzylshasyn jınaý naýqanyna erte qamdandyq. Bıyl baızaqtyq sharýalar tátti túbirdi 1207 gektar alqapqa ekti. Qazir strategıalyq daqyldyń gektarǵa shaqqandaǵy ónimdiligin eskerip ústimizdegi jyly qant zaýytyna 35-36 myń qant qyzylshasyn ótkizýdi mejelep otyrmyz, –deıdi aýdan ákiminiń orynbasary Bolat Saǵynbekov.

Aýdandaǵy qant qyzylshasyn jınaýǵa alǵashqylardyń biri bolyp Osman Zýlýf-ogly jetekshilik jasaıtyn «Zýlýf-ogly» sharýa qojalyǵy kiristi. Sharýa qojalyq tátti túbir alqabynyń ár gektarynan 600 sentner ónim alýdy josparlap otyr.

–Bıyl biz aýdandaǵy aýyl sharýashylyǵy salasynyń eń negizgi sektory sanalatyn qant qyzylshasy alqabyn 55 gektarǵa deıin ulǵaıta aldyq. Mundaǵy 15 gektar jerge tamshylatyp sýarý tehnologıasy engizildi. Negizinen qant qyzylsha óte kóp kútimdi qajet etetin daqylǵa jatady. Sondyqtan onyń babyn tapqandar ǵana mol ónimge kenelmek, - deıdi Osman Zýlýf-ogly.

Óz kezeginde Taraz qant zaýyty da asa jaýapty kezeńge daıyndyǵyn óz deńgeıinde qamdaǵan. Eń bastysy sharýalar mundaǵy jyl saıyn qaıtalatyn ónimdi ótkizýde túziletin uzynsonar kezektiń azaıǵanyna dán rıza. Júk kólikteri alqaptan jańa jınalǵan qyzylshany tarazy tartyp, tıisti orynǵa aýdaryp óz jolymen ketip barady.

Aýdanda strategıalyq daqyl sanalatyn qyzylsha alqabyn ulǵaıtý, bul daqyldy egýge iri agroqurlymdardy tartý jumystary óz deńgeıinde júzege asyrylyp keledi. Ótken jyly da baızaqtyqtar 38 myń tonnadaı qant qyzylshasyn jınaǵan edi. Bıyl egis alqaby 800 gektarǵa azaıǵanymen jınalatyn ónim kólemi sol kúıinde qalǵandyǵy sharýalardyń bul daqyldy ósirý tehnologıasyn jetik meńgergenin ańǵartady.