Almaty qalasynda 4 kólik soǵysqan jol apatynan eki adam qaza tapty.Bul týraly qalalyq polısıa departamentiniń baspasóz qyzmeti habarlady.

Polısıa departamentiniń málimdeýinshe, oqıǵa túngi saǵat 01:40-ta Almatynyń Almaly aýdanynda bolǵan. 1999 jyly týǵan Almaty oblysynyń turǵyny BMW avtokóligin mas kúıde júrgizgen. Ol Seıfýllın dańǵylynyń boıymen Bógenbaı batyr kóshesiniń qıylysynda baǵdarshamnyń qyzyl túsine ótip ketken. Osy kezde Bógenbaı kóshesimen batys baǵytta qaraı Audi markaly avtomobıl ketip bara jatqan. BMW bar jyldamdyǵymen kelip, Audi kóligine soǵysqan. Soqqy saldarynan Audi kóshe boıyndaǵy baǵanaǵa jáne talǵa soǵylyp, ary qaraı baryp Subaru Forester jáne Toyota Carina kólikterin soqqan.

Jol-kólik oqıǵasy saldarynan 1992 jáne 1993 jyly týǵan eki adam ( Audi jolaýshylary) oqıǵa ornynda kóz jumdy. Ártúrli dene jaraqatyn alǵan alty adam aýrýhanaǵa jetkizildi.

«Bul fakt QR QK-niń 345-baby 4-bóligi boıynsha, sotqa deıingi tergeýdiń biryńǵaı tiziliminde engizildi. VMW júrgizýshisi dereý ustalyp, ýaqytsha ustaý ızolátoryna qamaldy. Atalǵan qylmystyq istiń materıaldaryn Almaty qalalyq rolısıa departamentiniń tergeý basqarmasy óndiriske qabyldady»,– dep habarlady Almaty qalalyq polısıa departamenti.