Jambyl oblysy Qyrǵyz Respýblıkasymen aýyly aralas, qoıy qoralas jatqandyqtan, eki el arasynda alys-beris jıi oryn alady. Onyń arasynda azyq-túlik, úı janýarlaryn tasymaldaý jumystary kóp. Osyndaı memleket aralyq tasymal kezinde kórshi elden túrli qaýipti aýrýlar juqtyrǵan mal ótýiniń qaýpi joǵary. Bul qaýip ózge de shetelderden keletin taýarlarǵa qatysty. Dese de Jambyl oblystyq veterınarıalyq baqylaý jáne qadaǵalaý aýmaqtyq ınspeksıasy atalǵan jaǵdaıdy tolyq baqylaýynda ustaý boıynsha jumystar júrgizýde.

Máselen, 2019 jyldyń 9 aıynyń ishinde Jambyl oblysy aýmaǵyna 3219 bas iri qara mal Reseı, Germanıa, Avstrıa, Polsha, Chehıadan, 2 702 400 dana ınkýbasıalyq jumyrtqa Túrkıadan, 6 933,524 tonna qus eti AQSH-tan, 186,262 tonna muzdatylǵan balyq Norvegıadan, 21194,4 tonna sút ónimi Kyrǵyzstan jáne Lıtvadan ımporttalǵan. Sondaı-aq, Qyrǵyzstan Respýblıkasynan elimizdiń aýmaǵyna qazaq-qyrǵyz shekarasynda ornalasqan veterınarıalyq-sanıtarıalyq beketter arqyly 236 bas janýar, 18 307,9 tonna sút ónimderi, 125,8 tonna et jáne et ónimderi, 114,6 tonna balyq jáne balyq ónimderi ótkizilgen.

Atalǵan taýarlardyń el azamattary úshin qaýipsizdigin qadaǵalaý maqsatynda QR Úkimetiniń Qaýlysymen jaqyn ornalasqan Qazaqstan-Qyrǵyzstan memlekettik shekaralarynda baqylaý pýnktteri uıymdastyrylǵan. Qarasý jáne Sypataı batyr beketterinde mobıldik vagondar, Aısha Bıbi beketinde mobıldik zerthana avtokóligi ornalastyryldy.

Ókinishke oraı, Veterınarıalyq baqylaý jáne qadaǵalaý komıtetiniń Jambyl oblystyq aýmaqtyq ınspeksıasy basshysynyń orynbasary Jandar Qoekeev veterınarıalyq baqylaýdy atqarýǵa qatysty memlekettik organdardyń yqpal etý algorıtmi boıynsha jumys aqsap turǵanyn aıtady.

– Buryn mundaı aýmaqtarda patrýldik polısıa basynda bolǵan, qazir joq, shekara jáne memlekettik kirister departamentiniń qyzmetkerleri tasymaldanatyn obektileri boıynsha málimet bermeıdi, birigip jumys atqarmaıdy. Osyǵan baılanysty Qyrǵyzstan Respýblıkasynan Qazaqstan Respýblıkasyna aýsyl aýrýyna kirgizýge qoıylǵan ýaqytsha shekteýler búgingi kúnge deıin alynǵan joq. Sol sebebti, Qyrǵyzstan - Qazaqstan memleketteriniń shekarasyndaǵy veterınarıalyq baqylaý beketterinde memlekttik organdarmen birlese otyryp áreket etý óte mańyzdy. Memlekttik organdarmen birlese otyryp durys áreket etken jaǵdaıda ǵana Jambyl oblysynyń ǵana emes, Qazaqstan Respýblıkasynyń epızootologıalyq jaǵdaıyn saqtaýǵa tolyq múmkinshilik jasalady.

Qazaqstan Respýblıkasynyń aýmaǵyna veterınarıalyq-sanıtarıalyq baqylaýǵa jatatyn júkterdi kirgizý reestrine Qyrǵyz Respýblıkasynyń 82 óndiris oryndary engizilgen. onyń ishinde: sút ónimderin óndiretin - 23, ulttyq sút ónimderin óndiretin - 1, balyq ónimderin óndiretin - 18, et ónimderin óndiretin - 12, bal ónimderin óndiretin - 25 kásiporyn tirkelgen. Munyń barlyǵy baqylaýda, – deıdi aýmaqtyq ınspeksıa basshysynyń orynbasary.