«Qarapaıym zattar ekonomıkasyn» damytyp, jurtshylyqtyń tabysyn arttyrýǵa baǵyttalǵan jambyldyq jobany jurtshylyq jyly qabyldaǵany anyq. Qara halyq qorany qazynaǵa, aýlany tabysqa toltyrýǵa bolatyndyǵyna kózi jetti. Buny pılottyq on okrýgti aralap shyqqan oblys ákimi Asqar Myrzahmetov te buqaraǵa jiti túsindirdi. Osydan sabaq shyǵarǵan aýyldaǵy aǵaıyn qazir jobaǵa jan úrleýge jeń túre kirisken, dep jazady Qamshy.kz aqparat agenttigi.  Ras, aýyldaǵy aǵaıynnyń basym bóligi tabystyń kózin óz aýlasynan tabýǵa bolatyndyǵyn bastapqy da túsinbedi. Sonda ǵana aýyl damıdy, eldiń eńsesi kóterilip, jaǵdaıy jaqsaratynyn da sezinbedi. Alaıda bıylǵy jyl basynan beri oblys ákimi bastaǵan jumys toby óńirdegi barlyq aýyldyq eldi mekenderge arnaıy baryp, 138 myń aýlany tolyq zerdelep shyqty.

Jurtshylyqtyń 60 paıyzy aýylda turatyn Jambyl oblysy úshin qarapaıym zattar ekonomıkasyn damytýdyń naqty qajettiligi týyndap otyrǵany da aqıqat. Osy másele kóterilgeli oǵan at salysyp, memlekettik saıasatty qoldap otyrǵan jandar eldi mekenderde búginde asyp jyǵylady.

Máselen Jýaly aýdanynda turatyn Toqtarbek Spataevtyń otbasy óz úıi mańyn qosalqy sharýashylyqqa aınaldyryp, tabysyn tamnyń irgesinen taýyp otyr.

Jýaly aýdany Bılikól aýyldyq okrýginińde turatyn Spataevtar otbasy óz úıiniń aýlasyn tıimdi paıdalanyp otyrǵanymen kópke úlgi. Ótken jyldan bastap, mal jáne qus sharýashylyǵy baǵytyndaǵy jumystardy qolǵa alǵan eńbek adamy qarapaıym zattar ekonomıkasy boıynsha 2,5 paıyzben nesıe alý aýyl halqy úshin orasan paıda deıdi. Bılikól turǵyny óz aýlasynda 200 qus pen 100 den astam qoı ósirip otyrǵan eńbek adamy.

Aýyl turǵyny kól mańynda turatyn bolǵandyqtan munda mal ósirýge, balyq sharýashylyǵyn damytýǵa qolaıly jer kóp. Sýly aımaqtyń jeri de nýly keletinin bılikóldikter jiti túsinedi. Bıyl 120 bas mal bordaqylaý keshenin salǵan Toqtarbek Spataev bul jerdiń tabıǵı jaǵdaıyn eskerip, qorany da erekshe turǵyzýǵa kúsh salǵan.

Spataevtar otbasy aldaǵy ýaqytta munda sút jáne et baǵytyndaǵy jumystardy jandandyratyndyǵyn alǵa tartyp otyr. Ol úshin qora qopsy daıyn, nndi ákimdik tarapynan jeńildetilgen nesıe berilse sharýashylyqty budan da shıratý maqsaty tur. Úıiniń aınalasyna gúl otyrǵyzyp, jasyl –jelekpen kómkerip otyrǵan otbasy keler kóktemde aýlasyndaǵy bos jatqan jerge kókónis egýdi de josparlaýda.

Iá, osylaısha qosalqy sharýashylyqty damytý jumystary búginde Jambyl oblysynda qarqyn alýda. Bul tásil óńirdiń barlyq aýdandary men aýyldarynda júzege asyp, bılik pen halyq arasynda naqty túsinik qalyptasady degen úmit zor. Biz bastamanyń jemisti bolaryna bek senimdimiz.