Indýstrıa jáne ınfraqurylymdyq damý mınıstrligi muǵalimder men dárigerlerge jalǵa beriletin baspananyń sharttary týraly aıtty.

 Bıyldan bastap qazaqstandyq muǵalimder men dárigerlerge "Qazaqstan ıpotekalyq kompanıasy"AQ-dan satyp alý quqyǵy bar arendalyq baspana beriledi.

Páterdi jalǵa alý merzimi – 20 jylǵa deıin. Jyldyq mólsherlemesi – 3,1%.

Páter alý úshin bastapqy jarna qajet emes. Sondaı-aq Qazaqstan ıpotekalyq kompanıasy tek jańa páterlerdi ǵana satyp alady.

Mysaly, páter quny 9,6 mıllıon teńge delik. Aı saıynǵy tólem shamamen 53 myń teńgeni quraıdy.

Bir aıta keterligi, jalǵa alý qunyna eksplýatasıalyq jáne komýnaldyq qyzmetterdiń tólemi kirmeıdi.

 Búdjet salasynyń qyzmetkerlerine arnalǵan turǵyn úı baǵdarlamasy 2019 jyldyń maýsymynda iske qosylǵan bolatyn. Baspanaǵa muqtaj adamdardyń tizimin bilim jáne ǵylym mınıstrligi men densaýlyq saqtaý mınıstrligi jasaıdy. Sodan keıin QIK azamattyń tólem qabilettigin baǵalap, baspanany jalǵa berý kelisimshartyn bekitedi.

 Aldaǵy eki jyl ishinde baǵdarlamany iske asyrýǵa 40 mılıard teńge baǵyttalyp, 3 myńǵa tarta dáriger men muǵalimdi baspanamen qamtý josparlanyp otyr.

 Búginde Almaty qalasynda 4,3 mıllıard teńge (288 páter), Qaraǵandyda 0,2 mıllıard teńgeniń (21 páter) kelisimsharty bekitilgen. Nur-Sultanda 146 páter satyp alý úshin 1,9 mıllıard teńgeniń kelisimshartyna qol qoıylady.