QR aqparat jáne qoǵamdyq damý mınıstri Dáýren Abaev "Habar" arnasyndaǵy "Otkrytyı dıalog" baǵdarlamasyna suqbat berip, qoǵamdaǵy ózekti máselelerge qatysty pikir bildirdi.

Suqbat barysynda jýrnalıs mınıstrden Qazaqstandaǵy qosúkimet jaıyndaǵy áńgimelerge baılanysty kózqarasyn surady.

Abaev Elbasy jýyrdaǵy suqbatynda qosúkimetke qatysty qańqý sózdiń bárin teristegenin aıtty.

– Prezıdenttiń jumysyna Elbasy tarapynan eshqandaı aralasý joq, bolmaıdy da. Onyń barlyǵy konstıtýsıalyq normalarmen shektelgen. Ekinshiden, Toqaev – ekinshi  Nazarbaev emes. Onyń ózindik basqarý stıli, ózindik kózqarasy bar. Sondyqtan qosúkimet týraly áńgimelerdi qozǵaýdyń qajeti joq. Úshinshiden, Elbasynyń ózi atap ótkenindeı, Qasym-Jomart Toqaev mańyzdy máselelerde tuńǵysh prezıdentpen keńesip turady. Ony Qasym-Jomart Kemelulynyń ózi de aıtqan, – dep túıindedi mınıstr.

Sondaı-aq baǵdarlama barysynda Elbasy suqbaty, tabysy tómen otbasylarǵa nesıe berýdi shekteý, Arab sheıhtaryna dýadaq atýǵa ruqsat berý, qazaqstandyq BAQ-ta negatıvtiń jıi jazylatyny syndy máseleler sóz boldy.