Údemeli ındýstrıaldy-ınnovasıalyq damytý baǵdarlamasy aıasynda Jambyl oblysynda kóptegen óndiris oryndary ashylyp, óz jumystaryn jolǵa qoıyp aldy. Osy oraıda «Talas Investment Company» jaýapkershiligi shekteýli seriktestigi Jambyl oblysy, Qarataý qalasynyń tóńireginde natrıı sıanıdi zaýytynyń qurylysyn qolǵa alyp, búginde jumysyn jemisti jalǵastyrýda.

Barshaǵa belgili, Qarataý qalasynyń tarıhy hımıa ındýstrıasynyń damýymen tyǵyz baılanysty. Munda saladaǵy tehnıkalyq mamandar shoǵyry qalyptasty. Erterekte temirjol jelisi tartylǵan. Mine, osyndaı faktorlar jańa zaýyt qurylysynyń ornyn tańdaýda oń septigin tıgizdi.

Atalmysh jobany júzege asyrý úshin 24,2 mıllıard teńgeden astam qarajat jumsaldy. Onyń ishinde 16,2 mıllıard teńge «Qazaqstan Damý banki» aksıonerlik qoǵamy arqyly alynsa, kompanıa quryltaıshylary 7 mıllıard teńgeden astam qarajat quıdy. Sonymen qatar "Bıznestiń jol kartasy-2020" memlekettik baǵdarlamasy arqyly ınfraqurylym júrgizý úshin memlekettik búdjetten 1,47 mıllıard teńge bólindi.

2014 jyldyń maýsym aıynda barlyq qurylys-montajdaý jumystary aıaqtaldy. 2015 jyly jáne 2016 jyldyń basynda iske qosý jumystary júrgizildi. Al, 2016 jyldyń shildesinen sapalyq negizderge saı natrıı sıanıdiniń alǵashqy legi shyǵaryla bastady. Munda shıkizat berýden bastap daıyn ónim shyǵarǵanǵa deıingi tehnologıalyq proses tolyqtaı avtomattandyrylǵan. Ári óndiris tehnologıasy álemdik standarttarǵa sáıkestendirilgen.

Qazirgi tańda zaýyt Qazaqstan boıynsha natrıı sıanıdi sıaqty biregeı ınovasıalyq ónim shyǵaratyn jáne atalmysh ónimdi ımporttaýǵa qabiletti tuńǵysh ári teńdessiz nysan bolyp sanalady. Bul turǵyda otandyq daıyn ónimdi jetkizýshiler jáne tutynýshylarmen ortaq memorandýmdar jasalǵan.

Búginde natrıı sıanıdin óndirý kompanıanyń belgilengen josparyna sáıkes, óndiristik qýattylyǵyna shyǵyp keledi. Sonymen qatar daıyn ınovasıalyq ónim «Altynalmas», «Varvarınskoe», «GMK Kazahaltyn» aksıonerlik qoǵamdary, «Kazsınk» jaýapkershiligi shekteýli seriktestigi jáne 20-dan astam altyn óndirýshi kompanıalarǵa jóneltilýde. Budan bólek ónim qosymsha Reseı, Tájikstan, Qyrǵyzstanǵa eksporttalýda. Al, mıneraldy tyńaıtqyshtardy Almaty, Jambyl jáne Túrkistan oblystarynyń sharýalary tutynýda.