Jastar jylynyń ashylý saltanatynda Elbasy Nursultan Nazarbaev qabiletti jastarǵa mol múmkindikter usynyp, mańyzdy qajettilikterin qamtamasyz etý úshin Úkimetke negizgi bes tapsyrmany pysyqtaýdy tapsyrǵan bolatyn. Sonyń ishinde jastardy jumyspen qamtý máselesi boıynsha da naqty mindetter júkteldi.

Elbasy tapsyrmasyna sáıkes aldaǵy ýaqyttan bastap nesıe berýdiń jáne oqytý isiniń oń tájirıbesi negizinde barlyq óńirde «Jas kásipker» baǵdarlamasy ázirlendi. Joba aıasynda jyl saıyn bilim alatyn jumyssyz jastar men ózin ózi jumyspen qamtyǵandardyń sany 100 myń adamǵa deıin tolyǵady degen jospar bar.

Qazirgi tańda «Atameken» ulttyq kásipkerler palatasy «Bastaý» jobasy boıynsha 11 myńnan astam bıznes jobalar iske qosylyp, 16 myńǵa jýyq jumys orny ashylǵan.

İske talap bildirgen jastarǵa qoldaý kórsetý qajettigin eskertken Elbasy: «Úkimetke «Bıznes-2020» jol kartasy aıasynda jas kásipkerler úshin grant boıynsha bólinetin qarjy kólemin eki ese arttyrýdy tapsyramyn. Jalpy, úsh jyl ishinde 300 myńǵa jýyq jastarymyz bıznestiń qyr-syryn meńgerip shyǵady. Kem degende 80 myń adam nemese olardyń tórtten biri óz kásibin bastap, el ekonomıkasyna eleýli úles qosatyn bolady» – degen edi. Talapty jastarǵa jasalyp jatqan múmkindikter munymen ǵana shektelmeıdi. Endi bitirýshi kýrstardaǵy 60 myńǵa jýyq stýdentti bızneske baýlý úshin baǵdarlama qabyldanyp, ony júzege asyrýǵa 2019-2021 jyldary 32,1 mıllıard teńge bólinedi. Osyndaı oń bastamalar jambyldyqtardy da jigerlendirip tastaǵany sózsiz. Qazirgi tańda aımaqta jas kásipkerlerdi qoldaýǵa baǵyttalǵan kóptegen tirlikter júzege asýda.

-Bul – memlekettiń jastarǵa jasap otyrǵan úlken qamqorlyǵy. Buǵan deıin de Elbasy bastamasymen talaı baǵdarlamalar qolǵa alynyp, jobalar júzege asyrylylǵan bolatyn. Máselen, «Zhas Project» jobasy boıynsha Talas aýdanynda jalpy 33 joba tapsyrylyp, onyń ishinde bes jobaǵa bólim tarapynan qoldaý kórsetildi. Atap aıtsaq, «Beauty Naz» áleýmettik shashtarazyna 576,6 myń, «Bóbek Damu» balalardy jan-jaqty damytý ortalyǵyna 1000,0 myń, ashyq aspan astyndaǵy «Youth Cinema» kınoteatryna 998,4 myń, «Djuks» tigin sehyna 993,97 myń, «Talas travelers» jobalaryna 962,66 myń teńge bólindi. Jalpy jobalar úsh kezeń boıynsha irikteldi. Nátıjesinde aýdan ákimdigi kásipkerlik jáne ónerkásip bólimi tarapynan qoldaý kórsetilgen 5 jobanyń bireýi gratty ıaǵnı qaıtarymsyz qarjnyny ıelendi.

Budan bólek jastarǵa kásibin júrgizý úshin mekeme tarapynan agro qarjylyq uıymdar jáne ekinshi deńgeıli bankterden nesıe bólýi úshin tıisti jumystar atqarylyp jatyr. Ótken jyldyń ózinde 44 mıllıon teńgege jastardyń qatysýymen 12 joba iske asyryldy,-deıdi Talas aýdany ákimdiginiń kásipkerlik, ónerkásip jáne týrızm bóliminiń basshysy Aýdanbek Taýasarov.

Aldaǵy ýaqytta da kásippen aınalysýǵa tilek bildirgen jastardyń usynystary nazarǵa alynyp, olardy qoldaý jumystary jalǵasyn taba beredi.