Elbasy aıqyndap bergen ındýstrıalandyrý saıasaty Áýlıeata óńirin hımıa ónerkásibi myqtap damyǵan aımaqtardyń birine aınaldyrǵany sózsiz. Oblysta osy sala boıynsha ilkimdi ister jasalynyp, óńir ekonomıkasynyń ilgerileýine ózindik septigin tıgizip keledi. Máselen, sońǵy jyldary kenshiler qalasy Jańatasta táýelsizdiktiń eleń-alańynda turalap qalǵan óndiris oshaqtaryna jan bitip, qaıta jańǵyra bastady. Salaǵa serpin ákelgen «EvroHım» mıneraldyq-hımıalyq kompanıasynyń búginde jumysy júıelenip, zaýyt óndiristik qýattylyǵyn arttyrý úshin jańa jobalardy qolǵa ala bastaǵan.

Jalpy, 2010 jyldyń mamyr aıynda QR Úkimeti Kókjon jáne Gımmalfarbs fosfor ken oryndaryn ıgerý boıynsha konkýrs ótkizgen. Osy oraıda, elimiz úshin «EvroHım tyńaıtqyshtary» kompanıasy strategıalyq mańyzdy jobalaryn usynyp, kenshiler qalasynda jumysyn bastap ketken edi. Negizinen, atalǵan kompanıa jobasynyń damýy tutastaı alǵanda óńirdiń órkendeýine, sondaı-aq aýyl sharýashylyǵyn sapaly tyńaıtqyshtarmen qamtamasyz etip, saladaǵy ónimdiliktiń artýyna jaǵdaı jasamaq.

2012 jyly QR Úkimeti men «EvroHım» arasynda «Qazaqstan Respýblıkasyndaǵy mıneraldy tyńaıtqyshtar óndirisi jáne Qarataý fosfat baseınin ıgerý boıynsha zaýyt qurylysy» ınvestısıalyq jobasyn iske asyrý týraly tarıhı kelisimge qol qoıylyp, ken óndirýdegi jumystaryn bastap ketken-tin.

– 2013 jyly Túrkistan jáne Jambyl oblystaryndaǵy eki fosfat kenin ıgerýdi bastadyq. Ken ornynda óndiris 2014 jyldyń basynan bastap júzege asyrylýda. Qazirgi ýaqytta Qytaı jáne Ortalyq Azıa naryǵyndaǵy kalıı súlfaty men kúrdeli tyńaıtqyshtardy óndiretin kásiporyn qurý josparlanyp otyr. Búginde kompanıa kálsı hlorıdi, kálsı súlfaty jáne kúkirt qyshqylynyń qajettilikteri úshin dıkalsıı fosfatyn óndiredi. Bizdiń óndiristik aktıvter Reseıde, Lıtvıada, Belgıada, Qytaıda, Brazılıada ornalasqan. 25 eldegi satý keńseleri 100-den astam elderdiń klıentterine qyzmet kórsetedi. Ózderiniń teńiz termınaldary men vagon parki logıstıkalyq shyǵyndardy azaıtýǵa múmkindik beredi. Sonymen qatar kompanıa azot pen fosfat tyńaıtqyshtaryn shyǵaryp, kalıı ken oryndaryn ıgerýdi bastady. Kompanıanyń barlyq ónimderi standartty, ıaǵnı jalpy maqsattaǵy tyńaıtqyshtar jáne uzaq ýaqyt qoldanylatyn tyńaıtqyshtar mamandandyrylǵan tyńaıtqyshtar, – deıdi kompanıa basshysynyń ishki jáne syrtqy baılanys jónindegi keńesshisi Elmıra Kúzen.