«EvroHım» kompanıasynyń Jambyl oblysyna ınvestısıa quıýymen aımaqtaǵy hımıa ónerkásibi qarqyn ala tústi. Elbasy usynǵan ındýstrıalandyrý baǵytynyń jemisi osynda. Búginde «EvroHım» mıneraldyq-hımıalyq kompanıasynyń jumysy júıelenip, zaýyt óndiristik qýattylyǵyn arttyrý úshin jańa jobalardy qolǵa ala bastaǵan.

Kompanıa tarapynan ken oryndaryn ıgerý boıynsha ınvestısıalyq jobanyń birinshi kezeńi aıaqtalǵan. Nátıjesinde fosfat kenin óndirý jáne alǵashqy óńdeýge arnalǵan jobalyq qýattylyqqa qol jetkizildi. Atap aıtqanda, 2017 jyldyń naýryzynda 1 mıllıon tonna fosforıt keni óndirilse, ótken jyldyń aqpan aıynda mıllıon tonnadan asa fosfat alynatyn un óndirilip, tutynýshylarǵa jóneltilgen. Endigi jerde ınvestısıalyq jobanyń ekinshi kezeńiniń egjeı-tegjeıli jobalaý jumystary júrgizilip jatyr eken. Naqtyraq aıtqanda, bul kezeńniń 70 paıyzdan astam jumystary aıaqtalyp, hımıa kesheni qurylysynyń alańyn daıyndaý úshin qazba jumystary júrgizilýde. Jobany iske qosý 2021 jylǵa josparlanyp otyr.

– Atalmysh joba barysynda 500 jumys orny quryldy. Kompanıanyń qazaqstandyq kásiporyndarynda jumys isteıtin qyzmetkerlerdiń 85 paıyzy Jambyl oblysynyń turǵyndary. Hımıalyq keshenniń qurylysy aıaqtalǵannan keıin, óndiriste myńǵa jýyq adam jumys isteıtin bolady. Osyǵan baılanysty salalarda 2 myńnan astam adamǵa turaqty jumys kózderi paıda bolmaq. Osyndaı jumystar tutastaı alǵanda óńirdiń damýyna yqpal etip, Qazaqstannyń hımıalyq klasterin jaqsartýǵa eleýli úles qosatynyna senimdimiz, – deıdi kompanıa basshysynyń ishki jáne syrtqy baılanys jónindegi keńesshisi E.Kúzen.

Jalpy, kompanıa basshysynyń ishki jáne syrtqy baılanys jónindegi keńesshisi Elmıra Kúzenniń aıtýynsha «EýroHım» óndiristi jetildirýge den qoıýda. Máselen, ótken aptada el astanasy Nur-Sultan qalasynda QR Úkimeti men «EvroHım» kompanıasynyń basshylyǵynyń kezdesýi ótip, onda kompanıanyń bas dırektory Igor Nechaev jahandyq ınvestısıalar boıynsha josparlarymen bólisipti.

Sondaı-aq ol aýdıtorıaǵa «EýroHımniń» oblysymyzdaǵy Qarataý fosfat baseınin damytý jáne mıneraldy tyńaıtqyshtardy shyǵaratyn zaýyt salý boıynsha strategıalyq ınvestısıalyq jobany iske asyrý týraly baıandapty.Búginde bul baǵytta júıeli jumystar jalǵasýda.