San túrli saladan turatyn medısınalyq qyzmet sapasyn arttyrý máselesi qashanda ózekti. Ári bul baǵyt memlekettiń áleýmettik-ekonomıkalyq damý kórsetkishterindegiń eń negizgi faktor sanalady. Al bul saladaǵy sapaly qyzmet jedel kómekti júıeli uıymdastyrýdan kórinedi. Sol sebepten de Jambyl oblysynda jedel járdem kólikterine GPS navıgasıamen biriktirilgen «KÓMEK» avtomattandyrylǵan basqarý júıesi ornatyldy, dep jazady Qamshy.kz aqparat agenttigi. 

Dál osy júıeniń ornatylýymen jedel járdem qyzmetine túsken shaqyrtýlar sany 5000-ǵa deıin azaıdy.

–Ótken jyly jedel járdem qyzmeti 6 787 shaqyrtýǵa keshigip qyzmet kórsetse bıyl mundaı shaqyrtýlar sany 1882-ge deıin azaıdy. Al tamyz aıynda «Jambyl oblystyq medısınalyq jedel járdem stansasy» qyzmetin monıtorıńileý boıynsha 3 jumysshy toby quryldy. Bul shara kezinde 8 shaqyrtý jasalyp, nátıjesinde tórt keshigý faktileri anyqtaldy. Jedel járdem qyzmetiniń shaqyrtýǵa keshigýiniń negizgi sebepteri jedel stansasynan kesh shyǵýy, dıspecherdiń jumysy, kóshelerdiń jáne úılerdiń nómerleriniń joqtyǵy, jol jóndeý jumystary, úı aldyndaǵy kedergiler, júrgizýshilerdiń jol bermeýi syndy faktorlardan oryn alyp otyr. Negizininen túsken shaqyrtýlarǵa densaýlyq saqtaý salasynyń mamandary 1-7 mınýt aralyǵynda keshigip jetken. Sáıkesinshe bul másele oblys ákiminiń salalyq orynbasarynyń jiti baqylaýyna alyndy. Densaýlyqty qorǵaý jónindegi úılestirý keńesinde jedel járdem qyzmetiniń shaqyrtýlarǵa jedel jetýin baqylaý Taraz qalasy men aýdan ákimderiniń tikeleı nazarynda bolýy qajettigi aıtyldy, –deıdi oblys ákimdiginiń densaýlyq saqtaý basqarmasynyń basshysy Marat Jumanqulov.

Jádel jerdemniń shaqyrtýǵa shuǵyl jetýi naýqastyń ómirine arasha bolýmen qatar qarapaıym halyqtyń sala mamandaryna senimin de nyǵaıta túsedi. Sondyqtan jedel járdem qyzmetin minsiz uıymdastyrý jergilikti bıliktiń jiti nazarynda bolady.Brıgada mamandaryn qural-jabdyqpen qamtý isine basymdyq ta berilýi kerek. Sol sebepten de jedel kómek kórsetetin jambyldyq medısınalyq uıymdarǵa farmasevtıkalyq tońazytqysh satypalýǵa 87 mıllıon teńgege ótinim berilip, ol ótinim memlekettik satyp alý zańnamasyna saı qanaǵattandyrylý ústinde.