Memleket basshysy Qasym-Jomart Toqaev «Syndarly-qoǵamdyq dıalog – Qazaqstannyń turaqtylyǵy men órkendeýiniń kepili» atty halyqqa arnaǵan Joldaýynda shaǵyn jáne orta kásipkerlikti damytý boıynsha naqty mindetter júkteldi. Qazirgi tańda Jambyl oblysynda da bul baǵytta qyrýar jumystar atqarylýda. Ásirese, «Damý» kásipkerlikti damytý qorynyń aımaqtyq fılıaly tarapynan baıypty baǵdarlamalar laıyqty júzege asýda. Mysaly, Jambyl jerinde basym jobalardy kredıtteý tetigi qarastyrylǵan. Bul baǵdarlama 2018 jyldan bastap iske asyrylýda jáne ony iske asyrý kezinde Damý Qory kredıtter boıynsha syıaqy stavkasyn sýbsıdıalaý jáne kredıtterge ishinara kepildik berý quraldary boıynsha jeke kásipkerlik sýbektilerine qarjylyq qoldaý kórsete otyryp, qarjy agenttiginiń fýnksıalaryn júzege asyrady.

Jambyl oblysynda bul baǵdarlama boıynsha bıyl jalpy nesıe somasy 191 mıllıon teńgeni quraıtyn 4 joba maquldandy, onyń 3 boıynsha sýbsıdıalaý sharttary túzildi. Sýbsıdıalaý sharttary túzilgen jobalar boıynsha jalpy nesıe somasy 61 mıllıon teńgeni qurap otyr.

Aǵymdaǵy jyldyń 16 shildesinen bastap sońǵy qaryz alýshy úshin syıaqy stavkasy jyldyq 6 paıyzǵa deıin tómendetiletin túzetýler kúshine endi.

Sonymen qatar aımaqtyq fılıal «Eńbek» nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasy aıasynda da naqty jumystardy iske asyrýda.

Aıta ketý kerek, bul baǵdarlama 2017 jyly iske qosyldy. Osy baǵdarlama sheńberinde Damý Qory respýblıkalyq jáne jergilikti búdjetterden bólingen qarajatty isin jańa bastaǵan kásipkerler men startap-jobalardy nesıelendirý úshin, ekinshi deńgeıli bankter men mıkroqarjylyq uıymdarǵa ornalastyratyn qarjy operatorynyń fýnksıasyn oryndaýda.

Jambyl oblysynda bul baǵdarlama Taraz, Qarataý jáne Jańatas qalalarynda júzege asyrylýda. 2018 jyly «Eńbek» baǵdarlamasy boıynsha 1 mıllıard 232 mıllıon teńge bólinip, Damý Qory bul qarajatty ekinshi deńgeıli 6 bankke ornalastyrǵan bolatyn. Atap aıtqanda: «Sberbank» EB AQ – 385,6 mıllıon teńge, «Qazahstan Halyq Banki» AQ – 352,2 mıllıon teńge; «Forte Bank» AQ - 220 mıllıon teńge; «ATF Bank» AQ – 130 mln. teńge, «Bank SentrKredıt» AQ - 100 mıllıon teńge; «Evrazıalyq bank» AQ – 45 mıllıon teńge bólinip, ıgerilýde.