Ulttyq saraptama ortalyǵy Almaty aýasynyń lastaný deńgeıi joǵary ekenin anyqtady, – dep Qamshy.kz aqparat agenttigi habarlaıdy

Jyldyq josparǵa sáıkes, Ulttyq saraptama ortalyǵy qalanyń aýa baseıniniń jaı-kúıin anyqtaý úshin zerthanalyq monıtorıń júrgizdi. 2019 jyldyń birinshi jartysynda atmosferalyq aýaǵa 1576 zertteý júrgizilip, onyń ishinde 431 synamada sáıkessizdik anyqtaldy.

"Zertteý barysynda atmosferalyq aýanyń sanıtarlyq normalaryna sáıkes emestigi anyqtaldy. Azot dıoksıdi mólsheri ruqsat etilgen konsentrasıadan 2,2 ese, kúkirt dıoksıdi 1,2 jáne kómirtek totyǵy 1,4 eseden asty. Bul lastaýshy zattar negizinen ekologıalyq qaýip týǵyzyp, adam densaýlyǵyna keri áser etedi", – dep habarlady Ulttyq saraptama ortalyǵy.

Aýanyń lastanýy kóp adamda qalypty jaǵdaıda sezilmegenimen, dene tinderinde otteginiń jetispeýshiligin týdyrady. Bul kezde adamnyń basy aýyryp, júregi aınyp, esinen tanýy múmkin.

"Azot dıoksıdiniń aýada bolýy kómirtegi shyǵaratyn gazdarmen áreketteskende fotohımıalyq tumannyń paıda bolýyna yqpal etedi. Azot dıoksıdi –  bul sarǵysh-qońyr tústi gaz, ol kórý qabiletin nasharlatady, aýaǵa qońyr reń beredi, óte ýytty, bronhıt aýrýyn týdyrady jáne aǵzanyń tynys alý organdaryndaǵy aýrýlarǵa tótep berýin tómendetedi", – dep túsindirdi mamandar.

Sarapshylar qaladaǵy aýanyń lastanýynyń negizgi sebepterin atady. Ol – avtokólik qozǵalysy kezinde bólinetin kómirtek jáne kásiporyndardan shyǵatyn zıandy zattar. Sondaı-aq mamandar kóptegen kásiporyndar áli kúnge deıin eskirgen tehnologıamen jumys isteıtinin atap ótti.