Qasym-Jomart Toqaev álem tenısiniń juldyzdary Rafael Nadal men Novak Djokovıchpen kezdesti dep habarlaıdy Qamshy.kz aqparat agenttigi Aqorda saıtyna silteme jasap.

Memleket basshysy ataqty tenısshilerdi "Aqorda" rezıdensıasynda qabyldap, Rafael Nadal men Novak Djokovıchke Qazaqstanǵa kelgenderi jáne qaıyrymdylyq machyna qatysatyndary úshin rızashylyǵyn bildirdi.

"Bul - qazirgi zamannyń dańqty tenısshileriniń oıynyn Qazaqstanda kórýge keremet múmkindik. Atalǵan machtyń qaıyrymdylyq maqsatta ótip otyrǵany asa mańyzdy. Sizderdiń astanamyzǵa kelgenderińiz Qazaqstanda damyp kele jatqan tenıske úlken qoldaý ekeni daýsyz. Búgingi balalarǵa kórsetetin sheberlik sabaqtaryńyz olarǵa jaqsy úlgi bolady jáne shabyttandyrady dep senemin", - dedi Qasym-Jomart Toqaev.

Qazaqstandaǵy tenıstiń damýyna joǵary baǵa bergen Rafael Nadal men Novak Djokovıch Prezıdentke kezdesýge múmkindik jasaǵany jáne tenıske kórsetip otyrǵan qoldaýy úshin alǵystaryn aıtty. "Bul meniń Qazaqstanǵa úshinshi ret kelýim. Ár kelgen saıyn ásem Elordanyń kelbetinen rahat tabamyn. Degenmen bul jolǵy saparym erekshe. Óıtkeni ǵajap "Aqorda" saraıynda Ózińizben kezdesýge múmkindik aldym", - dep atap ótti Rafael Nadal.

"Prezıdent myrza, Qazaqstanda tenıske kórsetken qoldaýyńyz úshin alǵysymdy bildirgim keledi. Biz elderińizde tenıstiń nasıhattalýyna jáne damýyna óz úlesimizdi qosatynymyzǵa qýanyshtymyz, - dedi Novak Djokovıch.

Qasym-Jomart Toqaev sportshylarǵa tabys tilep, Rafael Nadaldi shańyraq kóterýimen quttyqtady.