Sát saıyn túrlenip, totydaı taranǵan Taraz qalasynyń sáýlettik kelbetin jaqsartýda oblys ákimdiginiń sáýlet jáne qala qurylysy basqarmasyna qarasty sáýlettik búro mekemesiniń qosqan úlesi qomaqty, dep jazady Qamshy.kz aqparat agenttigi. 

Ótken jyldyń maýsym aıynda ashylǵan mekemeniń negizgi mindeti Taraz qalasynda salynatyn nysandardyń nobaıyn syzyp, maketin daıyndaý bolyp tabylady. Arhıtektýralyq búro sáýletshileri ázirlegen nysandardyń nobaılary men maketteri apta saıyn oblys ákiminiń tóraǵalyq etýimen ótetin qala qurylysy keńesinde jan-jaqty talqylynady. Osy talqylaýdan ótken nysandardyń qurylysy ary qaraı merdiger kompanıalarǵa beriledi.

– Búginde sáýlettik búroda 8 sáýletshi jumys jasaıdy. Jumysymyzdy bastaǵan 1 jarym jyl ishinde qaladaǵy qurylys nysandardyń barlyǵyndaǵy kompozısıalarǵa bizdiń sáýletshiler óz úlesterin qosyp úlgerdi. Máselen buryn «Mahabbat aleıasy» atalǵan saıabaq «Jastar» aleıasy bolyp qaıta jańǵyrtyldy. Qaırat Rysqulbekov saıabaǵy kórkine kóz toımas kórikti orynǵa aınaldy. Sáýlettik búro aleıadaǵy eski sýburqaqtardy jańartý jumystaryn jobalaýmen aınalysty. Sondaı-aq, saıabaqta «Bilim» «Qarahan Aısha bıbi» stellalary ornatyldy. Óz kezeginde osy nysandardyń barlyǵy da sáýlettik búro mekemesi mamandarynyń ıdeıasynan týyndaǵan, –deıdi sáýlettik búro dırektory Arman Ábdeshov. Qazir sáýlettik búro mamandary ázirlegen nobaılar boıynsha Taraz qalasyndaǵy 15 shaǵyn aýdanda Oqýshylar saraıy, Kongres-holl, Qarjy ortalyǵy, Neke qıý saraıy, halyqqa qyzmet kórsetý ortalyǵy sekildi áleýmettik nysandarynyń qurylysyn qolǵa alý jumystary júrgizilýde.

Sáýlettik búro sáýletshileriniń endi bir toby «Kóne Taraz» tarıhı-mádenı arheologıalyq parki aýmaǵyndaǵy tarıhı-mádenı ortalyqty orta ǵasyrdaǵy sáýlettik úlgimen salý isine jumyldyryldy. Bul maqsatqa jetý jolynda sáýletshi mamandar irgetasy ortaǵasyrda qalanǵan Samarqand, Buqara qalalarynda bolyp, olardaǵy qurylys jumystarynyń barysymen tanysyp ta qaıtqan.

–Bul keshenniń aýmaǵyndaǵy oblystyq ólketaný murajaıy, kórkem sýret galereıasy, kórme ortalyǵy, «Rýhanıat» ortalyǵy syndy ǵımarattardy salynyp syrtqy árleýindegi árbir órnektiń áý bastaǵy sáýlettik jobadan aýytqymaýyn basty nazarda ustaımyz, –deıdi sáýlettik búro dırektory.