Q.Toqaevtyń sapary Almaty qalasyn damytý máseleleri jónindegi keńes otyrysynan bastaldy. Bul týraly prezıdenttiń baspasóz hatshysy Berik Ýálı facebook-tegi paraqshasynda málimdedi.

– Munda el taǵdyryna qatysty mańyzdy ári tarıhı sheshimder qabyldandy. Ata zańymyz, memlekettik rámizder, ulttyq valútamyz osynda bekitildi. Búginde Almaty bilim, ǵylym, mádenıet jáne iskerlik ortalyǵy retinde damyp keledi. Sońǵy jyldary qalaǵa jańa aýmaqtar qosylyp, kólemi 2 esege ulǵaıdy. Halqynyń sany 20 paıyzǵa ósip, bir mıllıon segiz júz myń adamǵa jetti. Qalada basqa óńirlerden kelgen jáne osy tóńirekte turatyn jarty mıllıonǵa jýyq adam jumyspen qamtylyp otyr, – dedi Q.Toqaev.

Memleket basshysy búgingi tańda ishki jalpy óniminiń úshten biri Almaty jáne Nur-Sultan qalalaryna tıesili ekenine nazar aýdardy.

– Almaty táýelsizdik jyldary iri ekonomıkalyq ortalyqqa jáne respýblıkalyq búdjettiń donoryna aınaldy. Shahar ishki jalpy ónimniń besten birin, memlekettik búdjetke túsetin túsimniń 20 paıyzdan astamyn jáne bankter beretin nesıeniń 60 paıyzyn qamtamasyz etip otyr. Sondaı-aq, elimizdegi kóterme jáne bólshek saýdanyń 40 paıyzdan astamy, syrtqy saýda aınalymynyń 15 paıyzǵa jýyǵy osy qalada júrgiziledi. Qala ınvestorlar úshin qolaıly iri óńirlik ortalyqqa aınaldy. Qazir Almatyda bankterdiń, halyqaralyq uıymdar men transulttyq kompanıalardyń bas keńseleri ornalasqan.

Prezıdent sapar aıasynda "Jańa Almaty" baǵdarlamasynyń tusaýkeserimen tanysyp, "Balalar úıiniń" tárbıelenýshilerine páter kiltterin tabys etip, Almaty qalasynyń áleýmettik-ekonomıkalyq damýyna arnalǵan keńeske qatysady.

Sonymen qatar «Tech Garden» ınovasıalyq klasteriniń jumysymen, Investısıa úıiniń tynys-tirshiligimen tanysady. Budan bólek ál-Farabı atyndaǵy Qazaq Ulttyq ýnıversıtetine baryp, onda oqý korpýsy men "Keremet" stýdentterge qyzmet kórsetý ortalyǵynda bolady.