Shymkentte taekvondodan Azıa chempıonaty kezinde janjal shyqty. Jarys qarsańynda chempıonat ótkizetin oryn tabylmaı qalǵan – dep Qamshy.kz aqparat agenttigi habarlaıdy, "Astana" telearnasyna silteme jasap.

Eki kún bolatyn chempıonatqa Qazaqstan, Ózbekstan jáne Tájikstannan 400-ge jýyq sportshy kelgen.

ITF taekvondo federasıasynyń prezıdenti Aıdos Amanjolovtyń aıtýynsha, jarysty ótkizý úshin  jergilikti ýnıversıtettiń zalyn jalǵa alynǵan. Al keıin oqý ornynyń basshylyǵy kelisimnen bas tartypty.

Odan keıin uıymdastyrýshylar sport mektebimen kelisti. Alaıda týrnır bastalar kezde qatysýshylardyń bári dalada qaldy. Eshkim sebebin túsindirmegen.

ITF taekvondo federasıasynyń prezıdenti bul qasaqana jasalǵan áreket ekenin aıtyp otyr. Ol buǵan Shymkent jáne Túrkistan oblysy sport birlestikteri arasyndaǵy básekelestik sebep bolǵanyn alǵa tartty.

Al janjaldan soń chempıonat ótkizetin oryn tabyldy. Atap aıtqanda, jarys jeke oqý ornynda ótkizildi. Alaıda, sheteldik qatysýshylar mundaı jaıttan keıin Shymkentke jarysqa kelmeıtinin aıtyp otyr.

Shymkenttiń dene shynyqtyrý jáne sport basqarmasynda ITF taekvondo federasıasy jarysty zańsyz ótkizdi dep otyr.

"Azıa chempıonaty bir jyl buryn josparlanatyn shara. Respýblıkalyq federasıa, sport komıteti, mádenıet jáne sport mınıstrligi birlese akredıtasıadan ótkizedi. Federasıa akredıtasıadan ótpese, mádenıet jáne sport mınıstrligi moıyndamady degen sóz. Bul jarystarda oqys oqıǵa bolyp qalsa, kim jaýap beredi?", – dedi basqarma jetekshisi Álibek Nurtaı.

Oqıǵadan keıin Qazaqstannyń taekvondo federasıasy polısıaǵa aryz jazǵan. Olar ózderine jergilikti sport qaýymdastyqtary qoqan-loqy kórsetip jatqanyn aıtyp otyr.