Burynǵy polısıa qyzmetkeri, "jumysqa masań kúıde kelgeni" úshin qyzmetinen bosatylǵan Álibek Erǵazıev 29 qazanda Oral oblystyq soty ǵımaratynyń aldynda jalǵyz adamdyq pıket ótkizdi. Ol qolyna "Ádil sotty talap etemin" ("Trebýıý spravedlıvogo sýda") degen jazýy bar plakat ustap turdy. Buǵan deıin Erǵazıev pıket ótkizýge ruqsat jergilikti ákimdikke 70-ten astam ret ótinish bergen, biraq bılik eshbir ótinishin qanaǵattandyrmaǵan, dep jazady Qamshy.kz aqparat agenttigi Azattyqtyń deregin negizge alyp. 

Eki jyl buryn jumystan shyǵarylǵan Álibek Erǵazıev ózin qyzmetten "zańsyz qýdy" dep sanaıdy jáne muny sot arqyly dáleldegisi keledi.

- 2017 jyldan beri isimniń sotta ádil qaralýyn talap etip kelem, biraq áli kúnge deıin birde-bir sot otyrysy ótken joq. Sot meniń jumystan zańsyz shyǵarylǵanymdy dáleldese deımin. Mundaı sheshim narkologıalyq dıspanserdiń (qyzmetten qýý týraly) anyqtamasyna súıenip shyǵarylǵan. 2017 jyly jumys kúni bite salysymen olar meniń aǵzamnan 0,4 promıll ishimdik tapqan. Bul qalypty mólsher jáne tipti mınımaldy mólsherge de jetpeıdi, - deıdi Álibek Erǵazıev.

Oblystyq sot ǵımaratynyń aldyna plakatpen aksıaǵa shyqqan burynǵy polıseı máselege sot tóraǵasy nazar aýdarsa deıdi. Aksıa ótip jatqan orynǵa Oral qalalyq ishki saıasat bóliminiń ókili Berik Taýbaev keldi. Ol Álibek Erǵazıevke aksıanyń zańsyz ekenin eskertti. Taýbaev burynǵy polıseıdi aksıany tezirek aıaqtap, úıge qaıtýǵa asyqtyrdy. Alaıda Erǵazıev aksıany aıaqtaýdan bas tartyp, sot tóraǵasymen kezdesýdi talap etti.

Ákimdik ókili Berik Taýbaev Azattyq tilshisiniń suraqtaryna jaýap bergen joq.

Shamamen bir saǵat ýaqyt ótkennen keıin sot ǵımaratynan qyzmetker shyǵyp, Álibek Erǵazıevti sot tóraǵasymen kezdesýge shaqyrdy. Alaıda jýrnalıserdi ishke kirgizgen joq.

Keıinirek Álibek Erǵazıevtiń ókili Maqsat Aısaýytov Azattyqqa sot tóraǵasymen kezdesýde másele sheshilmegenin aıtty. Ol Álibek Erǵazıevke zańmen qarastyrylǵan merzimde shaǵymyn qarastyrýǵa ǵana ýáde bergen.

- Búgin №2 qalalyq sotyna sýdıalar men narkologıalyq dıspanser qyzmetkerleriniń ústinen shaǵym túsirdik. Endi jaýabyn 30 kún kútemiz, - dedi Maqsat Aısaýytov.