Elimizde jyl basynan beri esirtki zattaryn jarnamalaıtyn 5 myń saıt buǵattaldy,  – dep Qamshy.kz aqparat agenttigi habarlaıdy.

"Esirtkini zamanǵa saı ádistermen taratý kózi retinde ótkizýshiler ınternet-tehnologıalardyń barlyq áleýetin paıdalanýda. Saıttar men áleýmettik jeliler, Instagram, Telegram, Feısbýk, sonymen birge kıvı-ámıan, Iandeks olardyń quralyna aınalǵan. Jyl basynan beri İİM 5 myń saıtty anyqtalyp, olar buǵattaldy.

Halyqtyń, Úkimettik emes uıymdardyń ókilderiniń qatysýymen esirtki satylatyn saıttarǵa silteme jasaıtyn myńnan asa grafıtı-sýret joıyldy", – dedi QR İİM Esirtki qylmysyna qarsy is-qımyl departamentiniń bastyǵy Tilegen Matkenov vedomstvoda ótken baspasóz máslıhatynda.

Departament basshysynyń málimdeýinshe, respýblıkadaǵy esirtkige qatysty ahýalǵa aýqymdy deńgeıde Shýdaǵy shıkizattyq baza áser etedi.

"Esirtkiniń eldiń aýmaǵyndaǵy taralýyna jol bermeý úshin biz jyl saıyn "Kóknar" operasıasyn ótkizemiz. Bıyl operasıa barysynda 898 esirtkige qatysty qylmys anyqtaldy. Onyń 411-i ótkizýmen baılanysty bolsa, 156 jaǵdaıy asa iri kólemde saqtaýmen baılanysty bolǵan. 17 tonna esirtki túrleri tárkilendi",– dep departament basshysy sózin túıindedi.

Eske salsaq, buǵan deıin Tilegen Matkenov esirtkimen aınalysqan 5 qylmystyq toptyń áreketine shekteý qoıylǵanyn aıtty.