Búgin, 2 qarashada Jambyl oblysy Shý aýdanyndaǵy Belbasar aýylynda 400 oryndyq mádenı-sporttyq keshen ashyldy. Saltanatty sharaǵa oblys ákimi apparatynyń basshysy Rústem Dáýlet qatysyp, oblys ákimi Asqar Myrzahmetovtyń quttyqtaýyn jetkizdi. Sonymen birge Bolat Saýranbaevqa "Oblysqa sińirgen eńbegi úshin" tós belgisin tabys etti.

Qazaqstannyń burynǵy prezıdenti Nursultan Nazarbaevtyń "Bolashaqqa baǵdar: rýhanı jańǵyrý" maqalasy aıasynda Saýranbaevtar áýletiniń demeýshiligimen boı kótergen mádenı-sporttyq keshen - Jambyl oblysynyń 80 jyldyǵyna oraı paıdalanýǵa berilip otyrǵan alǵashqy nysan.

Ótken jyly irgetasy qalanyp, qazyǵy qaǵylǵan keshenniń qurylys jumystaryn merdiger "Sheber bıld" jaýapkershiligi shekteýli seriktestigi júrgizgen. Jobalyq quny 500 mıllıon teńgeni quraǵan. Jańa ashylǵan nysanda 50 adamdy turaqty jumyspen qamtý kózdelýde.

El ıgiligine berilgen zamanaýı mádenı-sport kesheni álemdik standarttarǵa saı salynǵan. Onyń jalpy aýdany 2600-den asa sharshy metr aýmaqty quraıdy. Eki qabatty ǵımaratta shaǵyn fýtbol, basketbol, voleıbol, boks, kúres jáne jattyǵý seksıalary ornalasqan. Sondaı-aq, onda sportshylar men keshen qonaqtary úshin býfet-asqana da qarastyrylǵan. Sport kesheniniń ishinde tórt kabınet, bir májilis zaly bolsa, syrtynda 100 avtokólikke arnalǵan kólik turaǵy bar.

Joba jetekshisi, demeýshi Bolat Saýranbaev bul nysan balalar men jasóspirimderge sportpen tolyqqandy aınalysýǵa arnalǵanyn, sport – densaýlyqty nyǵaıtyp qana qoımaı, minezdi tárbıeleý, tártip pen ózin-ózi jetildirýge serpin beretinin jetkizdi. Sonymen qatar ol "árbir azamat óziniń týǵan eli men jeriniń kórkeıýýine tamshydaı úles qosyp, damýyna atsalysýy – perzenttik paryz" ekendigin aıtty.

Eske salaıyq, Jambyl oblysynyń 80 jyldyq mereı toıyna oraı 80 nysandy el ıgiligine berý josparlanyp otyr. Bul sport kesheni – ashylatyn seksen nysannyń alǵashqysy. Aldaǵy ýaqytta, óńir mereıtoıy qarsańynda birqatar mádenı-tarıhı, áleýmettik nysandardy el ıgiligine berý kózdelip otyr.