Rýs qoǵamynyń el bolǵaly ermek etken bir qaǵıdaty – qoldan qudaı jasaý tehnologıasy. Patshalyq Reseıdiń dinmen ne úshin araz bolǵandyǵyn endi túsingen shyǵarsyz. Sebebi naǵyz Qudaı turǵanda jasandy qudaılarǵa sirá da oryn joq. Dinniń tanymdyq ( «Taýhıd» (Allaǵa serik qospaýdyń) negizgi maqsuty da osy-tuǵyn. Arǵysy Nıkolaı, bergisi Lenın men Stalınder de joǵarydaǵy perǵaýyndyq tehnologıanyń kezekti ónimderi bolatyn. Endi oılanyp kórińiz, «qudaı» óziniń naǵyz qudaı ekendigin seziný úshin oǵan qulshylyq etýshi, dálirek aıtsaq, tula boıymen táý etip tabynar tobyr kerek. Bizdiń áli kúnge paıymdaı almaǵan totalıtarlyq rejım tabıǵatynyń bar qupıasy osy ǵana. Onyń patshaǵa madaq, halyqqa tamaq (keı kezderi taıaq) atty qos tásilden turatyn qarapaıym ǵana mehanızmi bar.
Endigi áńgime álhamyn óz ómirimizge qaraı bursaq. BİZ OSY LAQTYRǴAN TASYMYZDYŃ bir basyna birneshe nesıe (kredıt) júktegen qazaqqa tıýinen nendeı taqsiretti ańǵararyp otyrmyz? Alýǵa jeńil, aıtýǵa ońaı osy bir istiń taqyletimizge túsirgen salmaǵy jaıynda bir sátke bolsyn oılanyp kórdik pe ózi? Árıne, buǵan bola bas aýyrtpaıtynymyz taǵy da aıdan anyq qoı. Múmkin sana sezimimizdiń memlekettik mazmunǵa ulasyp, ult pen urpaq haqynda oılaı almaýymyzdyń eń talmaý tusy da osynda jatqan bolar.
Áıteýir bar biletinim, tirshilik qazyǵyna arqandalǵan janbaǵar halyqtyń oılaý men oı jańalaýǵa (oqýǵa) degen ýaqytynyń joqtyǵy. Halyqty máńgilikke qul etip sanasyna shire, taqymyna buraý salyp, tyrp etkizbeı tunshyqtyrýdyń eń ǵajaıyp tásili de osy. Ókinishtisi sol, «oılandyrmaý» oıynynyń oıynshyǵyna (qýyrshaǵyna) aınalǵan bizderge qalǵany – tek jasandy «jaratýshylarǵa» arnap jappaı jarapazan aıtý. Osy jolda QASTERLİ ǴYLYM men QASIETTİ DİNDİ de aıaýsyz burmalap, ótpeli saıasattyń qoljaýlyǵyna aınaldyryp baqtyq. MEMLEKET SAIASATY ǴYLYM MEN IMANǴA BEIİMDELMEI, kerisinshe din men ǵylymdy ózderiniń ólermen pıǵylyna qaraı beıimdedi. Eldi el etetin de osy eki qundylyq edi ǵoı. Endi ne bolar ekenbiz? Álde jıyrma tórt saǵat boıy bir damyl tappastan «damyp jatyrmyz» deıtin teledıdardyń aıtqanyna sábıdeı senip otyrsaq pa eken?..
Yqylas Ojaıuly
