Almaty qalasy ákimdiginiń baspasóz ortalyǵynda QR Prezıdentiniń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» Joldaýyn, QR 2015-2025 jyldarǵa arnalǵan Sybaılas jemqorlyqqa qarsy strategıasy saıasatyn, qoǵamdyq sanany modernızasıalaý: adaldyq pen parasattylyq qaǵıdalaryn damytý máseleleri boıynsha brıfıń ótti, dep jazady qalalyq ákimdiktiń baspasóz qyzmeti.

Brıfıń barysynda Almaty qalasy boıynsha Sybaılas jemqorlyqqa qarsy is-qımyl departamentiniń sybaılas jemqorlyqtyń aldyn alý jáne parasattylyq basqarmasynyń basshysy Elnar Igilikov ulttyq ekonomıkanyń damýy men halyqtyń turmys jaǵdaıynyń jaqsarýy sybaılas jemqorlyqtyń deńgeıine qatysty ekenin, al ony túbegeıli joıý úshin árbir sýbektige jaýapkershilik júkteletinin atap ótti.

Árbir azamat, memlekettik organ, kvazımemlekettik sektor sýbektisi, qoǵamdyq birlestikter osynaý áleýmettik keleńsiz jaıtpen kúresip, onyń barlyq kórinisterine tózimsizdik tanytýlary tıis. Uıymnyń bastamasymen segiz oqıǵanyń úsheýine batyldyqpen taldaý júrgizildi. Memlekettik organdardyń osyndaı batyldyq tanytýy vedimistik múddeden attap ótip, jemqorlyqtyń sebepteri men sharttaryn joıady jáne qoǵamnyń qajettilikterine saı keletin problemalyq máselelerdi anyqtaıdy.

«Barlyq azamattardy, memlekettik organdar basshylaryn, uıymdar men kvazımemlekettik sektor sýbektilerin qol jaıyp otyrmaı, jemqorlyqtyń aldyn alyp, onyń osal jerlerine taldaý jasaýǵa, sybaılas jemqorlyqqa yqpal etetin sebep-saldarlardy joıýǵa shaqyramyn», – dep qorytyndylady sózin departamenttiń sybaılas jemqorlyqtyń aldyn alý jáne parasattylyq basqarmasynyń basshysy Elnar Igilikov.

Almaty qalasynyń bas ımamy Erkinbek Shoqaı meshit qyzmetkerleri arasynda jemqorlardyń joq ekenin, sonymen qatar dinniń kómegimen jemqorlyqpen qalaı kúresýge bolatynyn aıtty.

– Belgili bir juma kúnderi ımamdar respýblıka boıynsha meshitterde naqyl sózder aıtady jáne ıslamdaǵy paraqorlyqtyń kesiri, jemqorlyqtyń adam men qoǵamǵa qanshalyqty zıan keltiretini, jemqorlyqtyń memleketti qulatýy múmkin ekeni týraly paıdaly ýaǵyzdardy oqıdy. Bul – bizdiń sybaılas jemqorlyqqa qarsy júrgizip otyrǵan sharalarymyzdyń biri. Almatyda, mysaly, juma kúni 50-60 myń adam jınalady jáne biz olarǵa osy aqparatty jetkizemiz, – dedi Erkinbek Shoqaı.

Brıfıń barysynda «İzgilik elshisi» jalpyulttyq qozǵalysynyń kýratory Aınur Sabıtova Sybaılas jemqorlyqqa qarsy kúres qyzmetiniń tóraǵasy Alık Shpekbaevtyń qatysýymen 7 qazanda tusaýkeserleriniń bolǵanyn ári jumystarynyń bastalǵanyn aıtty. Búgingi kúnge deıin 120-ǵa jýyq volonter jobaǵa qatysýda, izgi.kz portaly iske qosylǵaly beri qozǵalysqa qatysýǵa nıet bildirýshiler sany artýda.

Joba óskeleń jas urpaqtyń boıyna adaldyq, óz otandastaryna, eńbekke degen súıispenshilik, meıirimdilik qasıetterin darytatyn bolady.

«Jas urpaqty elimizdiń qoǵamdyq ómirine keńinen tartý qajet. Jastar qoǵamdyq jumystarǵa óz erikterimen qatysatyn bolsa, jalpy problemalardy sheshýge jáne elimizdiń gúldenýine úles qosýǵa umtylady, al qoǵam qundylyqtar aınalasyna shoǵyrlanyp, barlyq adamdardyń parasattylyq pen adamgershilik tanytýyna yqpal etedi, jastarǵa adaldyqty, ózara kómekti, kelisim men patrıotızmdi dáripteıtin bolady», – dep atap ótti Aınur Sabıtova.