5-10 qarasha aralyǵynda elordada jumys isteıtin jastardan satyp alý quqyǵynsyz jaldamaly páter boıynsha ótinish qabyldanady. Jaldamaly páterge ótinimdi 29 jasqa deıingi jumys isteıtin jastar bere alady dep habarlaıdy Qamshy.kz aqparat agenttigi elorda ákimdiginiń resmı saıtyna silteme jasap. 

Páterdiń aı saıynǵy tólemi úıdiń jalpy aýdanynyń kólemine baılanysty 5 myńnan 15 myń teńge aralyǵynda bolady.

«Azamattarǵa yńǵaıly bolý úshin osy baǵdarlamany elektrondy túrde júrgizýdi jón kórdik. Ótinim Smart Astana portaly arqyly elektrondy túrde qabyldanady. Jaldamaly úıden úmitti bolsańyz Smart Astana portalynda ESQ arqyly onlaın rejimde ótinish jibere alasyz. Ótinish bergennen keıin biz ony óńdeımiz. Óńdeý ýaqyty birneshe kúndi alady. Osydan keıin ótinim berýdegi kemshilikterdi joıý úshin sizge bir kún beremiz. Eger siz tizimde bir nárseni umyt qaldyrsańyz nemese naqty mártebeńizdi, derekterdi naqtylaǵyńyz kelse, ár úmitkerge qujattardy tolyqtyrýǵa bir kún beremiz. Sondaı-aq ol da elektrondy tártipte júrgiziledi», – dedi elorda ákimdiginde ótken brıfıńte Nur-Sultan qalasy ákimdiginiń Turǵyn úı qorynyń dırektory Nursulý Qojahmetova.

Ótinimder qarashanyń 5-si men 10-y aralyǵynda qabyldanady. İrikteýden ótken jastardyń tizimi 2019 jyldyń 10 jeltoqsanynan keshiktirilmeı jarıalanady. Sondaı-aq jaldamaly páterge ilikken jastar bıyl jyl sońyna deıin qonys toıyn toılaıtyn bolady.

«Ár otbasynyń quramy ártúrli, sondyqtan mártebesi de árqalaı bolmaq. Kóp balaly bolsańyz da, úsh bólmeli páterdiń berilmeıtinin, tek bir jáne eki bólmeliler taratylatyny eskerý kerek. Turǵyn úı satyp alý, uzartý quqyǵynsyz bes jylǵa beriledi. Iaǵnı bes jyldan keıin biz sizden osy turǵyn úıdi bosatýdy suraýǵa májbúr bolamyz, óıtkeni biz bul páterlerdi basqa jastarǵa beremiz», – dep qosty Turǵyn úı qorynyń dırektory.

Belgili bolǵandaı, jalǵa beriletin turǵyn úıler Sh.Ýálıhanov-S.Seıfýllın kóshesiniń qıylysynda («Astanalyq» bazarynyń mańaıy), Bógenbaı batyr men Á.Jangeldın kóshelerinen beriledi. Bir bólmeli páter aýdany 30-45 sharshy metr bolsa, eki bólmeli 46-70 sharshy metr aralyǵynda. Bári de – jańa páterler. «Zań boıynsha biz aıaqtalmaǵan úıdi bere almaımyz. Jıhazdy jastardy ózderi satyp alýy kerek», – dedi N.Qojahmetova.

Al Almaty qalasynda «Nurly jer» baǵdarlamasyna ótinishter qabyldaý 30 qazanda bastaldy, 12 qarashaǵa deıin jalǵasady. Sonymen qatar jastarǵa arnalǵan baspana elordanyń qaı aýdandarynan beriletini habarlanǵan bolatyn. Jastarǵa arnalǵan baspanalardyń kilti jyl sońyna deıin beriletin boldy. Memlekettik turǵyn úıge qalaı kezekke turýǵa bolatynyn myna jerden kórýge bolady.