Avtokólik qýaty qozǵaltqysh kólemine táýeldi. Qozǵaltqysh kólemi úlkender "jelisti" keletini belgili. Biraq onyń quny da arzan emes. Sondaı-aq kólemdi qozǵaltqyshtardyń otyn shyǵysy kóbirek, salyǵy joǵaryraq. Freedom Finance Insurance saqtandyrý kompanıasynyń mamandary zertteý júrgizip, qazaqstandyqtar úshin qozǵaltqyshtyń qandaı kólemi unamdy ekenin anyqtady.

2019 jyldyń tamyz aıyndaǵy derekke sáıkes Qazaqstanda 3 698 309 avtokólik tirkelgen. Bul – ótken jylmen salystyrǵanda, 5,5 paıyzǵa kem. Eń kóp kólik sany Almaty oblysynda – 489 294. Sanyna qaraı ekinshi orynda Almaty (466 886), úshtikte Shyǵys Qazaqstan oblysy (296 080) jaıǵasqan.

Qazaqstandaǵy avtokólikterdiń kóbiniń (64,8%) shyǵarylǵan merzimi 10 jyldan asyp ketken. Shyqqanyna 3 pen 7 jyl bolǵan mashınalar úlesi 15,7 paıyz. Zaýyttan shyqqanyna 3 jyldan aspaıtyn mashınalar sany elimizde odan da az – 10,4%.

Qazaqstandyqtardyń deni qozǵaltqysh kólemi 1 500 – 2 000 tekshe sm mashınalardy tańdaıdy eken. Bundaı qozǵaltqysh kólemdegi avtokólikter sany 1 711 633. Bul – tirkelgen barlyq mashınalar sanynyń jartysyn quraıdy (46,3%). Tanymaldylyǵy boıynsha ekinshi orynda – qozǵaltqysh kólemi 1100 – 1500 tekshe sm. kólikter ( 667 951, 18,1%). Atalǵan qozǵaltqysh kólemi bar avtokólikter "qalalyq" dep tanylady. Sebebi, qalalyq júrgizýshiler úshin mashınanyń qýaty emes, otyn paıdalaný shyǵysy mańyzdyraq.

Tanymaldylyǵy boıynsha úshinshi orynda – qozǵaltqysh kólemi 2 000 – 2 500 tekshe sm. deıin avtomashınalary (16,7%). 

Qozǵaltqysh kóleminiń úsh túri: 3 000 – 4 000 tekshe sm (3,3%), 4 000 – 10 000 tekshe sm (1,9%) jáne 1 100 tekshe sm deıingi (1,3%) kólikter kóp kezdespeıdi.