Jaqynda Abai.kz aqparattyq portalynda «Bizge kezekti Prezıdent etip kimdi taǵaıyndaıdy?» atty maqala jaryq kórdi(http://abai.kz/post/view?id=4065). Bir qyzyǵy - atalmysh maqala QR Prezıdentiniń kezekti eńbek demalysyna shyǵýymen tuspa-tus jaryq kórip otyrǵandyǵy.
Maqala avtory Danıar Naýryz buryn eshbir jerde esimi atalmaǵan – Nurlan Ermekbaev degen fıgýrany – QR Prezıdenttigine Reseı taǵaıyndaıdy dep kórsetedi. Sóıtsek, Ermekbaevymyz – Reseıdiń úsh birdeı barlaý agenttiginde qyzmet etken, FSB-KGB-GRÝ-diń ákki tyńshysy kórinedi. Birneshe memleketterde elshilik qyzmette bolyp, KSRO Genshtabynyń atyshýly ofıseri de bolǵan-mys. Avtordyń aıtýynsha, Ermekbaev - Qytaı men Reseı úshin eń ymyrashyl, aıtqanyn istep, aıdaǵyna júretin basshy bolmaq kórinedi. Qytaıda birneshe jyl elshi bolǵan, Reseıdiń arnaýly tyńshysy. Eki memleketke de tıimdi kadr dep jazady avtor.
Sondaı-aq, maqalada «Jańa Prezıdentten» keıin QR Premer-mınıstrligine úmitker retinde Baqytjan Saǵyntaevtyń aty atalady.
Danıar Naýryzdyń aıtýynsha, Kárim Másimov myń jerden tyrashtanǵanymen Prezıdent bola almaıdy. Sebebi – uıǵyrdyń balasy. Al Qasym-Jomart Toqaev – tym ynjyq. Tasmaǵambetov – shýyldaq, daýshyl. Batystyń jigitteri – qyzbaqandy, soltústik pen shyǵystaǵylar Reseıge unamaıtyndyqtan, kandıdat bola almaıdy dep jazady. Sonda qalǵany – ońtústikten shyqqan saýdagerler deıdi.
Eń tańǵalarlyǵy, mundaı sybys Elbasynyń kezekti eńbek demalysyna shyǵýymen tuspa-tus kelip otyr. Maqalany oqyp otyryp, Memleket basshysynyń demalysta júrgenin paıdalanyp, iri saıası toptar Qazaqstanda aýys-túıis (memlekettik tóńkeris, referendým t.b. ) jasaýǵa árekettenýde me degen oıǵa qalasyz.
Ras. Eldi shırek ǵasyrǵa jýyq basqaryp kelgen Nursultan Nazarbaevtyń densaýlyǵy týraly qazaqstandyq basylymdar birazdan beri jazyp keledi. Tipti, bıylǵy kezekten tys Prezıdent saılaýyn Elbasynyń saıası sahnadaǵy sońǵy merzimi dep te topshylaıtyndar joq emes.
Soǵan qaraǵanda Qazaq bıliginde qandaıda bir saıası aýys-túıistiń salqyny sezile bastaǵandaı. Biraq, Elbasy bılikten bas tartaryn ashyp aıtqan joq.
Nurgeldi Ábdiǵanıuly
