7 qarasha kúni Almatydaǵy Respýblıka Saraıy janyndaǵy skverde qazaqtyń belgili kompozıtory Shámshi Qaldaıaqovtyń qoladan jasalǵan eskertkishi ashyldy.

Eskertkishtiń ashylý rásimine zıaly qaýym ókilderi, aqyndar men jazýshylar, mýzykanttar men ánshiler, onyń ishinde Muhtar Shahanov, Roza Rymbaeva, kompozıtordyń jesiri Jámılá Qaldaıaqova qatysty.

Eskertkishti ashqan Baqytjan Saǵyntaev Shámshi Qaldaıaqov shyǵarmashylyǵymen dúıim jurttyń tanys ekenin atap ótti. Onyń ánderin kompozıtordy «qazaq válsiniń koroli» ataǵan aǵa urpaq erekshe unatady.

«Búgin biz almatylyqtardyń jas urpaǵy jáne barsha qazaqstandyqtar úshin onyń esimin ulyqtadyq. Shámshi aǵamyz óziniń ánderin jastarǵa da, jastardyń mahabbatyna da, dýmanǵa da, el abyroıyn asqaqtatatyn jaǵyna da arnaǵan. Ol ánderimen ár shańyraqty terbetip qoıǵan joq. Búkil qazaq jerin terbetti. El táýelsizdik alǵan soń halyq ártisi ataǵyn aldy. Al biraq halqy onyń ataǵyn odan áldeqaıda buryn bergen. «Qazaq válsiniń koroli» degen. Ondaı ataqqa jetetin ataq joq. Bul – eldiń, halyqtyń súıspenshiligi», – dedi qala ákimi Baqytjan Saǵyntaev.

Sazgerdiń zaıyby marqum kózi ttirisinde ózin baqytty sezingenin aıtty. 

«Búgin sondaı qutty kún. Kelip, bas ıip quttyqtap kelgenderińizge rahmet. Shámshi Qaldaıaqov halyqtyń súıgen kompozıtory, baqytty jan. Maǵan «Jámıla, men óte baqytty adammyn, meni halyq jaqsy kóredi, barǵan jerimde qurmetteıdi» dep aıtatyn», – dedi Jámıla Qaldaıaqova.