Almaty ákimi Baqytjan Saǵyntaev medısınanyń bolashaq perspektıvalary talqylanǵan IV Halyqaralyq «Densaýlyq saqtaýdaǵy ınovasıa – 2019» ǵylymı forýmyna qatysty, dep jazady ákimdiktiń resmı saıty.

Forým Prezıdenttiń isbasqarmasy Medısınalyq qyzmetiniń 90 jyldyǵy aıasynda ótýde. Bul kún Prezıdenttiń isbasqarmasy Ortalyq klınıkalyq aýrýhanasynyń Almatyda 1929 jyly emhana túrinde ashylýynan bastaý alady.

«Búgingi kúni ol zamanaýı medısınalyq ortalyq, munda otandyq medısınany damytýshy jáne ozyq emdeý-dıagnostıkalyq praktıkany engizýshi úzdik dárigerler-jańashyldar qyzmet etedi», – dep atap ótti B. Saǵyntaev.

Qala ákimi «Sovmınka» retinde tanylǵan OKA tájirıbesiniń medısınalyq qyzmettiń sapasyn josparly túrde arttyrý maqsatynda Almatynyń barlyq medmekemelerine taratylatynyn atap ótti.

«Dárigerlerdiń kásibı biliktilik deńgeıi turaqty artatyn bolady, olardyń durys jumys jasaýy úshin biz barlyq jaǵdaılardy jasaımyz. Aıta keterligi,taıaýdaǵy úsh jyl ishinde aýrýhanalar men emhanalardyń jabdyqtalý deńgeıin 90%-ǵa deıin jetkizemiz», – dedi megapolıs ákimi..

Bolashaq medısınasynyń perspektıvalary talqylanǵan forým jumysy eki kúnge sozylady.