Indýstrıa jáne ınfraqurylymdy damytý mınıstri Beıbit Atamqulov Almaty áýejaıyn túrik kompanıasyna satý josparda bar ekenin aıtty dep jazady Qamshy.kz aqparat agenttigi. 

"Qazir bir túrik kompanıasymen kelissózder júrip jatyr. Qazirgi ýaqytta men túsinikteme bere almaımyn, bul ázirge aıaqtalmaǵan mámile. Almaty áýejaıy jeke kompanıanyń ıeliginde, sondyqtan ony iske asyrý jalǵasýda. Kelisýdi qajet etetin pýnktterdi Azamattyq avıasıa komıteti oryndaıdy", - dedi mınıstr úkimet otyrysynan keıin.

Atamqulov bul qadam qyzmet kórsetý sapasyna áser etetindigin jáne qosymsha ınvestısıalar tartylatyndyǵyn aıtty. 

"Meniń bilýimshe, birneshe áýejaılary bar kompanıa kiredi. Fransıadaǵy eki áýejaı bar sıaqty. Almaty áýejaıy - Ortalyq Azıadaǵy eń úlken áýejaılardyń biri.  Bizge jolaýshylarǵa yńǵaıly bolý úshin jolaýshylar termınalyn jańartý jáne qaıta qurý qajet, óıtkeni Almaty áýejaıy arqyly jolaýshylar tasymaly jyl saıyn artyp keledi. Sonymen qatar, jaqynda mınıstrliktiń «ashyq aspan» týraly buıryǵy qabyldandy, bul baǵyttardy kóbeıtedi", - dedi Beıbit Atamqulov. 

Ashyq aqparat kózderine súıensek, Almaty halyqaralyq áýejaıynyń 100 paıyz aksıasy nıderlandıalyq "Venus Airport Investment B.V" kompanıasyna tıesili.