Ońtústik Koreıada 7 jasar balany kólikpen urǵan qazaqstandyq jigittiń anasy zardap shekken balanyń otbasynan jáne Ońtústik Koreıa halqynan keshirim surady dep jazady Qamshy.kz aqparat agenttigi "Habar 24" saıtynyń deregin negizge alyp. Qazaqstandyq áıeldiń ońtústik koreıalyqtarǵa úndeýin jergilikti "JTBC NEWS" arnasy kórsetti.

"Men, Qazaqstan azamaty, Koreıa Respýblıkasyna meniń atymnan jáne ulymnyń atynan keshirim suraý úshin keldim. Men basymdy ıip otyryp, koreı halqynan osy elde bolǵan jol-kólik oqıǵasy úshin, apattan zardap shekken bala úshin keshirim suraımyn.Bul eki el arasyndaǵy másele bolǵandyqtan, biz keshirim suraýǵa erterek kele almadyq. Meniń balam qateligi úshin zań aldynda jaýap beredi. Men barlyq adamdardan balanyń tezirek saýyǵyp ketýin surap duǵa etýdi suraımyn.  Zardap shekken bala men onyń ata-anasynan da keshirim suraımyz. Qurmetti zardap shekken balanyń ata-analary! Men, ana retinde, sizdiń jaǵdaıyńyzdy túsinemin. Jaǵdaı sizge qatty áser etti. Men sizdiń ulyńyz úshin duǵa etemin. Biz sizdiń balańyzǵa aldaǵy operasıada kómektesýge daıynbyz. Eger aǵzany transplantasıalaý qajet bolsa, meniń ulym jáne men aǵzamdy berýge daıynbyz.  Balaǵa kómektesken barlyq koreıalyq dárigerlerge alǵysymyzdy bildiremiz", - deıdi qazaqstandyq áıel. 

Eske salsaq, qyrkúıek aıynyń sońynda Ońtústik Koreıada qazaqstandyq 20 jastaǵy jigit 7 jasar balany qaǵyp ketken. Bala jan saqtaý bólimine tústi, 18 jerden synǵan jáne bastan aýyr jaraqat alypty. Bul apat Ońtústik Koreıada úlken rezonans týdyrdy. Sebebi qazaqstandyq jigit Koreıada zańsyz júrgen, kólik júrgizýshi kýáligi bolmaǵan jáne oqıǵa ornynan izin sýytyp, elden qashyp ketken. Keıinnen jas jigit Pavlodardan tabylyp, sot tóreligin qaraý úshin Ońtústik Koreıaǵa jiberildi. Ol bes jylǵa deıin bas bostandyǵynan aıyrylýy múmkin. Qylmyskerdi jazalaý týraly prezıdent Mýn Chje Inge joldaǵan petısıaǵa 60 myńǵa jýyq adam qol qoıǵan.