Memleket basshysy Qasym-Jomart Toqaevtyń Qazaqstan halqyna Joldaýynda jarıalaǵan «Volonter jylynyń» qarsańynda Jambyl oblysynyń «Órleý» bastaýysh partıa uıymy «Ómir – ǵajaıyp» áleýmettik jobasyn bastady, dep habarlaıdy Qamshy.kz aqparat agenttigi «Nur Otan» partıasynyń baspasóz qyzmetiniń deregin negizge alyp. 

«Nur Otan» partıasynyń músheleri ózderiniń negizgi jumystarynan bólek, qarttar men balalarǵa, qıyn jaǵdaıǵa dýshar bolǵan otbasylarǵa qol ushyn berip, qaıyrymdylyq jumystaryna belsendi qatysady. Sheteldik ortalyqtardyń tájirıbesi boıynsha, «Órleý» BAU músheleri Qarttar úıindegi jalǵyzbasty qarttar men balalar úıiniń tárbıelenýshilerin úlken bir shańyraq astyna biriktirdi.

«Merekeler men ataýly kúnderdi birge ótkizý úshin búldirshinder aıyna birneshe ret Qarttar úıine arnaıy keledi. Balalar erteńgilikter, retro bı keshteri men taqyryptyq is-sharalar uıymdastyrady. Jaqynda №1 Arnaýly áleýmettik qyzmet kórsetý ortalyǵynda turatyn zaǵıp aqyn Aleksandr Karpınskııdiń óleńder jınaǵy jaryq kórdi. Al onyń kitabynyń jaryq kórýine bizdiń bastaýysh partıa uıymymyz at salysty. Sonymen qatar, biz balalardyń ózderine de arnap túrli merekelik sharalar uıymdastyryp, syılyqtar men táttiler úlestiremiz. Eń bastysy – júrek jylýy men qýanysh syılaýǵa tyrysamyz» - deıdi Jambyl oblystyq pedagogıkalyq qyzmetkerlerdiń biliktiligin arttyrý ınstıtýtynyń dırektory Gúlshat Medetbekova.

Qıyn jaǵdaıǵa tap bolǵan jalǵyzbasty analar men kóp balaly otbasylarǵa qoldaý kórsetý – «Nur Otan» partıasy basymdyqtarynyń biri. Sondyqtan da «Órleý» bastaýysh partıa uıymynyń músheleri volonterlik jumystarǵa únemi belsendi qatysady. Atap aıtqanda, jalǵyzbasty jáne kóp balaly analarǵa arnalǵan tegin trenıńter, balalar úshin sheberlik-synyptaryn ótkizip, az qamtylǵan otbasylarǵa materıaldyq qoldaý kórsetý sıaqty t.b. izgilikti isterdi turaqty túrde atqaryp keledi.