Shyǵys Qazaqstannyń oblys ortalyǵynda, Jambyl saıabaǵynda uly aqyn Jambyl Jabaevtyń eskertkishi saltanatty túrde ashyldy. Joba oblys ákimi Danıal Ahmetovtiń bastamasymen júzege asyryldy. Eskertkishtiń avtorlary ataqty músinshiler Sársen Seıtov pen Qazybek Dýlatov.

 

Eskertkishtiń uzyndyǵy eki jarym metrge jýyq. Tastyń ústinde dombyrada oınap otyrǵan Jambyl Jabaevtyń qoladan jasalǵan beınesi birneshe baspaldaqtan turatyn dóńgelek alańy bar tuǵyrǵa ornatylǵan.

 

Eskertkishtiń ashylý saltanatyna Jambyl Jabaevtyń týystary, óńirdiń zıaly qaýymy men qala jurtshylyǵy, aımaq basshysy Danıal Ahmetov qatysty.

 

– Aqynnyń shyǵarmashylyǵy jazbasha jáne aýyzsha kúıinde qazaq halqynyń arasynda keńinen taratyldy. Onyń týyndylarynan Otanǵa degen mahabbaty baıqaýǵa bolady. Ol halyqtyń muńy men erkindigin, tarıhı tulǵalar men batyrlardyń erligin jyrǵa qosyp, qoǵamdaǵy keleńsiz jaǵdaılardy synǵa alyp, shynshyldyq týraly óleń shyǵardy. Aqynnyń týyndylary aýyzsha túrde halyq arasynda taralyp, keıinnen birneshe tilge aýdaryldy. Búginde onyń shyǵarmashylyǵyn Reseı, Qytaı, Ulybrıtanıa, Chehıa men Slovakıa elderinde jaryq kórgen kitaptardan da oqýǵa bolady. Bul saıabaqqa Jambyl Jabaevtyń esimi berildi. Sondyqtan osy alań shyǵarmashylyq kezdesýler men baıqaýlardyń, tanymal mádenıet jáne óner qaıratkerleriniń bas qosatyn mekenine aınalsyn, – dedi Danıal Ahmetov.

 

Aıta keteıik, Qazaqstandaǵy ǵımarattarǵa, kósheler men saıabaqtarǵa aqynnyń aty-jóni berilgen. Sondaı-aq eskertkishter ashylǵan. Shyǵys Qazaqstanda Jambyl Jabaev atynadǵy 5 mektep, 3 eldi meken, 33 kóshe bar.