Megapolısti uzaq merzimdi damytý boıynsha ázirlengen qujat sarapshylar men jurtshylyqtyń keńinen talqylaýyna usynyldy. Joba nusqasy boıynsha Almatynyń İskerlik keńesiniń músheleri jumys istedi, dep jazady ákimdiktiń resmı saıty.

Almatyny damytýdyń basty strategıalyq qujaty qala ákimi Baqytjan Saǵyntaevtyń tapsyrmasy boıynsha talqylanýda. Almaty ákimi megapolıstiń tynys-tirshiligine qatysty ázirlegen barlyq mańyzdy qujattardy jurtshylyqtyń barlyq ókilderi, ÚEU, isker jandar, qalanyń belsendi azamattary jan-jaqty talqylaýlary tıis ekenin atap ótti.

Búgin qala ákimderiniń orynbasarlary, basqarma basshylary, qalanyń «Atameken» UKP-nyń jáne «Almaty» ÁKK-nyń ókilderi Almatynyń İskerlik keńesiniń múshelerimen kezdesý ótkizdi. Keńes quramyna jahandyq baǵdarlamalar, tıimdilikti basqarý, «aqyldy qalany» damytý jáne ınovasıalyq damý, ýrbanıstıka jáne kólik, kreatıvti ındýstrıa, qoǵamdyq bastamalar komıtetteri enedi.

«Halyq banki» AQ basqarmasynyń tóraıymy Úmit Shaıahmetova, «AB Restaurants» JSHS basqarýshy dırektory Asqar Baıtasov, «Magnum Cash&Carry» JSHS basqarmasynyń tóraǵasy Azamat Osmanov, «SK Sentras Inshýrans» AQ dırektorlar keńesiniń tóraǵasy Eldar Ábdirazaqov, IDC vıse-prezıdenti Andreı Beklemıshev, «Tan media Group» dırektorlar keńesiniń tóraǵasy Armanjan Baıtasov, «Qazaqstan kásipkerleriniń forýmy» ZTB-niń atqarýshy dırektory Mýnavara Paltasheva, «Rakýrs» JSHS seriktesi Dosym Qydyrbaev, Ernst&Young basqarýshy seriktesi Erlan Dosymbekov, «Oi-QaragaiLesnayaSkazka» JSHS bas dırektorynyń orynbasary Dana Balfanbaeva óz usynystaryn aıtty.

Bıznes-qoǵamdastyq ókilderi qala ákimi B. Saǵyntaevtyń Almatyny uzaq merzimdi damytý jóninde aıtqan negizgi jeti bastamasyn júzege asyrý sharalaryn talqylady.

İskerlik keńestiń komıtetteri usynystar men talqylaýlardy jınaqtaıtyn, sonymen qatar bıznes-qoǵamdastyqtyń, azamattyq sektordyń, úkimettik emes uıym men ákimdiktiń qalany damytýǵa baǵyttalǵan usynystaryn óńdeý men júzege asyrýdyń pármendi dıalog alańyna aınalýlary tıis.

Eske salsaq, buryndary «Almaty – 2050» strategıasynyń jobasy qalanyń sarapshylar qoǵamdastyǵymen jáne qoǵamdyq keńes múshelerimen talqylanǵan edi. Qala ákimi B. Saǵyntaevtyń tapsyrmasy boıynsha Strategıa jobasy taıaý arada halyqtyń keńinen talqylaýyna usynylatyn bolady. Sarapshylar men almatylyqtardan túsken usynystar jumysshy toptarynyń otyrystarynda talqylanady. Budan ózge, qujat jobasy qoldanystaǵy barlyq dıalogtik alańdarda talqylaýǵa usynylady.