Álem boıynsha jyl saıyn 1,5 mln adam jol-kólik oqıǵasynan qaza tabady. Bul týraly Ortalyq komýnıkasıalar qyzmetinde ótken brıfıńte Dúnıejúzilik densaýlyq saqtaý uıymynyń turaqty ókili Oleg Chestnov aıtty, – dep Qamshy.kz aqparat agenttigi habarlaıdy.

"Álem boıynsha jyl saıyn 1,5 mln adam, kún saıyn 2600, ár 24 sekýnd saıyn 1 adam jol-kólik oqıǵasynan kóz jumady. Beıbit kúnde osyndaı kórsetkish bolýy –  óte qaıǵyly jaǵdaı", – deıdi Oleg Chestnov.

 Ol jol-kólik oqıǵasynan kóz jumý jaǵdaılaryn ólimniń aldyn alýǵa bolatyn sebepterge jatqyzatynyn aıtty.

"Ókinishke qaraı, Qazaqstanda jáne álem boıynsha 15-29 jas aralyǵynda ólimniń negizgi sebebi – jol-kólik oqıǵasy. Dárigerler jol-kólik oqıǵalarynan zardap shekken adamdarǵa kómektesedi. Alǵashqy medısınalyq kómek kórsetken jaǵdaıda jol-kólik oqıǵasynan qaza tapqan 100 paıyzynyń 60 paıyzy qutqarylýy múmkin edi. Dáriger retinde kólik júrgizýshilerine aıtarym, alǵashqy medısınalyq kómek kórsetýdi meńgerip alý kereksizder", – deıdi ol.

Eske salsaq, qarasha aıynyń úshinshi jeksenbisi – Dúnıejúzilik jol-kólik oqıǵalarynyń qurbandaryn eske alý kúni.