Almaty ákimi Baqytjan Saǵyntaev Máskeý úkimetiniń mınıstri, syrtqyekonomıkalyq jáne halyqaralyq baılanystar departamentiniń basshysy Sergeı Cheremındi qabyldady, dep jazady ákimdiktiń resmı saıty.

S. Cheremın Almatyǵa Máskeýdiń Mádenıet kúnderine Reseıdiń astanasynan kelgen delegasıany basqarady. Kezdesý barysynda mınıstr damýdyń qalalyq baǵdarlamalaryn, qoǵamdyq keńistikti ózgertýdiń, densaýlyq saqtaý men bilim salasyndaǵy reformalardy júzege asyrýdyń tájirıbeleri týraly aıtty. Sonymen qatar, qonaq turǵyn úı qoryn, kólik ınfraqurylymyn modernızasıalaý jáne komýnaldyq sharýashylyqty sıfrlandyrý, megapolıstiń tynys-tirshiligin qamtamasyz etý jónindegi aqparatpen bólisti.

Almaty ákimi Baqytjan Saǵyntaev qalany basqarý júıesine jańa tehnologıalar men ınovasıany engizýde Máskeýdiń damý tájirıbesiniń utymdy ekenin atap ótti.

«Bizdiń qalalarda yntymaqtastyqty jáne densaýlyq saqtaýdy, bilimdi, kólik ınfraqurylymyn, TKSH jáne sıfrlandyrýdy modernızasıalaý máseleleri boıynsha tájirıbe almasýda jaqsy perspektıvalar bar», - dedi B. Saǵyntaev jáne Máskeý sıaqty Almatynyń da ortalyqtandyrý boıynsha damıtynyn atap ótti.

Almatyda «shetsiz qala» qaǵıdasy boıynsha turatyn jerine qaramastan jaıly ómir súrý jáne áleýmettik qyzmetterdi alý úshin barlyq jaǵdaılar jasalatyn bolady.