Ulttyq ulannyń sapynda qyzmet etý kóptegen óren úshin mártebe. El tynyshtyǵyn kúzetip, qorǵan bolý árbir azamattyń boryshy. Boryshyn abyroımen ótep, bergen anttaryna adal jandar synnan ótti.

QR Tuńǵysh Prezıdenti, Elbasy Nursultan Nazarbaev 2018 jylǵy 5 qazandaǵy Joldaýynda quqyqqorǵaý organdarynyń qyzmetkerlerin attestasıadan ótkizýdi mindettegen bolatyn. Osy oraıda 5513 áskerı bóliminiń jeke quramy QR İshki ister mınıstiriniń buıryǵymen Ulttyq ulan Bas qolbasshysynyń josparyna sáıkes kezekten tys attestasıadan ótti. Bir aptaǵa jýyq jeke quram óz bilimderimen qatar atys daıarlyǵy jáne dene shynyqtyrý daıarlyǵy boıynsha synnan ótti.

–Ulttyq ulandaǵy bul synaqtar – jaýyngerlik qyzmet sapasyn arttyrýdy, bilikti mamandardan tolyqqandy kadrlyq rezerv qurýdy, ár áskerı qyzmetshiniń iskerlik, tulǵalyq jáne jeke qasıetterin jan-jaqty ári ádil baǵalaýdy, olardyń kvalıfıkasıalyq talaptar men óz laýazymyna sáıkestigin anyqtaýdy kózdeıdi. Aldymen jek quram «Taraz-Arena» sport saraıynda túrli normatıvter boıynsha sporttyq daıyndyqtaryn synady. Sondaı-aq 5513 áskerı bóliminiń bazasynda ulandyqtar bilimderin kórsetý úshin 50 suraqtan turatyn test tapsyryp, palegonda atý jattyǵýy boıynsha synnan ótti, – dedi 5513 áskerı bólimi komandıriniń tárbıe jáne áleýmettik quqyqtyq jumystary jónindegi orynbasary Damır Qasymov.

Úsh jylda bir ótetin atestatsıanyń negizgi maqsaty – quqyqtyq tártip áskeri áskerı qyzmetshileriniń qyzmetin, olardyń kásibı jáne qyzmettik qabiletterin jan-jaqty ári ádil baǵalaý, sondaı-aq kadrlardy iriktep, durys taǵaıyndaý. Úsh normatıv boıynsha synnan ótken áskerıler atys daıarlyǵynan, Makarov tapanshasymen «Paıda bolatyn nysanalar boıynsha orynnan shapshań atý», al Kalashnıkov avtomatynan qol pýlemetinen jáne Kalashnıkov pýlemetinen «Paıda bolatyn nysanalar boıynsha orynnan atý» jattyǵý sharttaryn oryndady. Jyl basynan beri qyzý daıyndyq júrgizgen shendiler árbir normatıv boıynsha joǵary kórsetkish kórsetýge baryn saldy.

– Bizge attestasıa bolatyndyǵy týraly jyl basynan aıtyldy. Búgingi tańda árbir áskerıdiń daıyndyǵy joǵary deńgeıde. Munda jas ereksheligine baılanysty da normatıvter bólinedi. Ulttyq ulannyń sarbazy kez kelgen ýaqytta formada bolý kerek. Sondyqtan bizder úshin bul kúndelikti jumysymyz ispetti. Attestasıadan ótý asa bir qıyndyq týǵyzady dep aıta almaımyn, – deıdi №5513 áskerı bólimi shtabynyń mamany Janar Sadvakasova.

Birneshe kúnge sozylǵan attestasıalaýdan súringen shendiler úshin taǵy bir múmkindik beriledi eken. Biraq ol kezeńnen de súringen ulandyq jumystan bosatylady.