Almatyda qalalar arasyndaǵy seriktestik jáne baýyrmaldyq qaty­nas­tardyń 25 jyldyǵyna oraılas­tyrylǵan Máskeý mádenıetiniń kúnderi ótýde.

Shyraıly shaharǵa taban tiregen Máskeý delegasıasyn Máskeý úkimetiniń mınıstri, Syrtqy ekono­mıkalyq jáne halyqaralyq baılanys­tar departamentiniń basshysy Sergeı Cherómın bastap keldi. Mádenı kúnder 28 gvardıashyl-panfılovshylar saıaba­ǵynan oryn tepken «Dańq»  memorıa­lyna gúl shoqtaryn qoıýdan bastaldy.

Odan sońǵy is-shara «Almaty Arena» saraıynda uıymdastyrylǵan jasós­pirimder arasyndaǵy boks týrnırimen jalǵasty.

«Rixos» qonaqúıinde ótken ekonomı­kalyq-iskerlik konferen­sıasynyń plenarlyq sesıalarynda eki megapo­lıstiń ınfraqurylymdyq, sonymen qatar, qos qalanyń ekonomı­kalyq, ınvestısıalyq jáne iskerlik yntymaq­tastyǵynyń máseleleri tal­qylandy. 1994 jyldyń qazan aıynda Almaty men Máskeý ózara baýyrlas qala ekendik­terin resmı túrde málimdep, ózara yntymaqtastyq kelisimine qol qoıǵan bolatyn. Sol dostyqqa 25 jyl tolyp otyr. Eki megapolıs arasyndaǵy mádenı, rýhanı is-sharalar da sodan beri bir toqtaǵan emes. Bilim, densaýlyq, mádenıet salasynda birlesip atqarǵan jobalar qarasy da birshama.

Abaı atyndaǵy memlekettik akade­mıalyq opera jáne balet teatrynda Máskeý men Almaty arasyndaǵy dostyq qarym-qatynastyń qashan, qalaı ornap, damyǵandyǵyn beıneleıtin «Almaty–Máskeý dostyǵyna 25 jyl» fotokórmesi uıymdastyryldy. Kórme ekspozısıasyna Máskeý qalalyq bas arhıvinen alynǵan tarıhı qujattar men fotografıalar qoıylǵan.

Mádenıet kúnderi aıasynda Qazaq­stannyń Ońtústik astanasyna máskeý­lik aldyńǵy qatarly óner ujymdary da keldi. Olar Abaı atyndaǵy memlekettik akademıalyq opera jáne balet teatrynyń ásem de eńseli sahnasynda ónerlerin kórsetti.

Nurjamal ÁLİSHEVA