Alǵashqy medısınalyq–sanıtarıalyq kómektiń qol jetimdiligin arttyrý densaýlyq saqtaý salasy boıynsha Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev tapsyrǵan mejeli mindet sanalady. Atalǵan tapsyrmany Jambyl oblysynda óz deńgeıinde oryndaý maqsatynda júrgizilgen jumystar nátıjesinde, jambyldyqtardyń medısınalyq nysandarǵa degen suranysy jyl sońyna deıin tolyqtaı qanaǵattandyrylmaq, dep jazady Qamshy.kz aqparat agenttigi. 

Jergilikti jerde oblys ákiminiń bastamasymen júrgizilgen zerdeleý jumystarynyń nátıjesinde óńir turǵyndaryna áli 95 medısınalyq nysan qajettiligi anyqtaldy. Ótken jyly osy nysannyń 39-y paıdalanýǵa berilip, belgili bir deńgeıde turǵyndardyń qajettili ótelgen bolatyn. Onyń ishinde 29 nysannyń máselesi memlekettik-jekeshelik áriptestik aıasynda sheshimin tapty. Al 1 nysan satyp alynyp, 9 nysan búdjet esebinen soǵyldy. Bul jumystarǵa byltyr oblystyq búdjetten 1 mıllıard 300 mıllıon teńge bólingen bolatyn. Sáıkesinshe bul qarjyny maqsatty ıgerý nátıjesinde oblystyń shalǵaı eldimekenderinde jańa medısınalyq mekemeler paıdalanýǵa berildi. Sol arqyly basy aýyryp, baltyry syzdaǵan aýyl turǵyndary aýylynan uzamaı sapaly medısınalyq kómek alý múmkindigine qol jetkizdi.

Bıyl da dál osy júıe arqyly eldi mekenderdiń 65 medısınalyq mekemege suranysy ótelmek. Nátıjesinde óńir turǵyndarynyń medısınalyq nysandarmen qamtý kórsetkishi 100 paıyzǵa teńesedi. Sala mamandarynyń sheshimimen densaýlyq nysandarynyń qurylys jumystarynyń merzimin 7 jyldan 2 jylǵa qysqartyldy. Sondaı-aq ońtaılandyrý sharasy arqyly nysan qurylysyna jumsalatyn 4 mıllıard 200 mıllıon teńge qarjy da únemdeldi.

Sonymen qatar Taraz qalasynda boı kóterip jatqan jańa 14-shaǵyn aýdannyń aýmaǵyndaǵy 200 tósektik onkologıalyq dıspanserdiń qurylys jumystary júrgizilip jatyr. Jalpy somasy 13 mıllıard 900 mıllıon teńge qarjy jumsalǵan dıspanser 2021 jyly paıdalanýǵa berilmek.Aldyn ala boljam boıynsha bul biregeı nysan onkologıa salasynda sapaly medısınalyq qyzmet kórsetetin ámbebap keshenge aınalmaq. Munda onkologıalyq aýrýlardyń aldyn alý boıynsha keshendi jumystar júrgiziletin bolady.